2Sa pagkadungog ni Juan nga Magbubunyag didto sa prisohan bahin sa mga buhat ni Cristo, gipaadto niya kang Jesus ang pipila sa iyang mga tinun-an. 3Ug nangutana sila kang Jesus, “Sultihi kami, ikaw ba ang giingon ni Juan nga moanhi, o magpaabot pa ba kamig lain?” 4Si Jesus mitubag: “Pamauli kamo ug suginli si Juan sa inyong nadungog ug nakita: ang mga buta nakakita, ang mga bakol naka­lakaw, 5ang mga sanlahon naayo, ang mga bungol nakadungog, ang mga minatay naban­haw, ug ang Maayong Balita gisangyaw ngadto sa mga kabos. 6Bulahan ang wala magduhaduha kanako!”

7Samtang ang mga tinun-an ni Juan namauli, misulti si Jesus ngadto sa mga tawo mahitungod kang Juan: “Sa pag-adto ninyo kang Juan didto sa dapit nga awaaw, unsa may gipaabot ninyo nga makita? Bugang ba nga gipilaypilay sa hangin? Unsa may giadto aron tan-awon? 8Usa ba ka tawo luho og pamiste? Ang mga tawo nga nagbiste og sama niini atua magpuyo sa mga palasyo. 9Sultihi ako, unsa man gayod ang inyong gipaabot nga tan-awon? Propeta ba? Oo, Sultihan ko kamo, nakita ninyo ang labaw pa sa usa ka propeta: 10kay si Juan mao ang giingon sa kasulatan: ‘Ania ang akong sinugo, nagaingon ang Dios, ipadala ko siya una kanimo aron iyang andamon ang imong pagaagian.' 11Hinumdumi kini! Si Juan nga Magbubunyag labaw kang bisan kinsa nga natawo sukadmasukad. Apan siya nga labing ubos sa Gingharian sa langit labaw pa kaniya.” Ang Ebanghelyo sa Ginoo.

oOo

KAHULOGAN SA EBANGHELYO (Mateo 11: 2-11)

2aSa pagkadungog ni Juan nga Maghubunyag didto sa prisohan bahin sa mga buhat ni Cristo…

Sa ebanghelyo sumala ni San Mateo, si Juan nga Magbubunyag gihisgotan sa upat ka higayon (Tan-awa sa Mt. 3:1-17, Mt. 4:12, Mt. 11:2-18, ug Mt. 14:1-13).

2b… gipaadto niya kang Jesus ang pipila sa iyang mga tinun-an. 3Ug nangutana sila kang Jesus, “Sultihi kami, ikaw ba ang giingon ni Juan nga moanhi, o magpaabot pa ba kamig lain?”

Uban sa dakong kahinangop si Juan naglaum nga moabot ang Manluluwas. Sa miaging Domingo, nabati nato kon unsa ka popular ang iyang singgit: “Ang Gingharian sa Dios haduol na!”

Apan karon si Juan nagduda. Nasayop ba kaha siya?

Makapatandog ang iyang pagduda! Atong ibutang ang atong kaugalingon sa iyang nahimutangan. Gibilanggo siya sa prisohan sa Machaerus. Gipabilanggo siya ni Herodes. Sa maong bilanggoan gihasol siya sa iyang Pagtuo. Gitay-og ang iyang Pagtuo sa daw usa ka tingog nga sa kanunay nagsulay kaniya: “Ang tanan nga imong gituohan dili tinuod. Ang imong Jesus dili mao ang Mangluluwas. Wala man gani siya makaluwas kanimo gikan sa imong bilanggoan!” Sama sa unsay gituohang Manluluwas sa mga katawhan niadtong panahona, si Juan nagpaabot og usa ka magmadaogong Mangluluwas nga mobuntog sa tanang mga kaaway sa Israel. Para kang Juan, si Jesus wala makapakita sumala sa unsay gituohan ni Juan nga maoy larawan sa usa ka Manluluwas. Napalaw si Juan sa unsay iyang gipaabot nga iyang makit-an diha sa usa ka Mangluluwas: ang usa ka Mangluluwas nga gamhanan sa mga gahum nga yutan-on.

Daghang higayon nga ang Dios mipalaw kanato. Wala Siya magpakita o mobuhat sumala sa atong tawhanong hunahuna mahitungod Kaniya. Ug sama kang Juan, nagpadayon kita sa pagpaabot nga ang Ginoo mobuhat gayod sumala sa unsay atong pagbuot ug nga Siya mahisama gayod sa unsay atong gihunahuna ug gibati mahitungod Kaniya. Oo, ngano ba kaha nga gipasagdan man ni Jesus nga si Juan mabilanggo? Ngano nga wala man si Jesus manalipod sa tawo nga maoy nangandam sa Iyang agianan? Ngano nga ang Dios mitugot man nga adunay mga tawo nga sa dili makatarunganong paagi gibilanggo? Ngano nga morag ang Dios sigi lang gilupigan sa iyang mga kaaway? Ngano nga si Juan sa dili madugay putlan man sa ulo sa sugo ni Herodes? Hain man diay ang gahum sa Dios? Sa atong kabahin ngano man nga daghan mang mga dautan nga nahitabo sa atong mga palibot?

Ginoo, tubaga kami! Mangita pa ba kamig laing Mangluluwas? Magpadayon ba kami sa pagsalig diha Kanimo? O talikdan ka ba namo? Mao kini ang gitawag og Krisis sa Pagtuo! Daw gibilanggo usab ang atong Pagtuo sama sa pagbilanggo kang Juan! 4Si Jesus mitubag: “Pamauli kamo ug suginli si Juan sa inyong nadungog ug nakita: 5ang mga buta nakakita, ang mga bakol naka­lakaw, ang mga sanlahon naayo, ang mga bungol nakadungog, ang mga minatay naban­haw, ug ang Maayong Balita gisangyaw ngadto sa mga kabos. Si Jesus wala motubag pinaagi sa diretsong Oo o Dili. Iya hinoong gihagit ang nangutana sa pagdiskobre sa iyang kaugalingon kon kinsa gayod Siya. Wala siya mohatag og luto-nang-tubag (ready-made-answer).

Si Jesus hinoon mikutlo sa Balaang Basahon (tan-awa diha sa Basahon ni Isaias 26:19, 29:18, 35:5, 61:1). Mipasabot si Jesus nga ang iyang pagkamangluluwas dili alang sa gahum nga kalibutanon, dili aron sa pagpanimalos batok sa mga kaaway, kondili sa pagpadayag sa gugma ug kaluoy ngadto sa nag-antos—mga buta, bakol, sanglahon, bungol, ug uban pa. Ug ang labing lawom nga kahulogan sa iyang buhat sa pagpangluwas anaa sa iyang duha ka gipamulong: Una, ang kamatayon nabuntog pinaagi sa pagkabanhaw, ug ikaduha, ang Maayong Balita gisangyaw ngadto sa mga kabos.

6Bulahan ang wala magduhaduha kanako!”

Pagka misteryoso sa paagi sa Dios! Ang magwawali nga si Juan nga nagdapit sa mga tawo sa pagtuo mao na hinoon karon ang gidapit ni Jesus ngadto sa pagbaton og pagtuo. Ang nangandam sa agianan (precursor) nga gitagana alang niadtong naghupot og matuod nga pagtuo: nga ang pagtuo usahay mosangko gayod sa kamatayon. 7Samtang ang mga tinun-an ni Juan namauli, misulti si Jesus ngadto sa mga tawo mahitungod kang Juan: “Sa pag-adto ninyo kang Juan didto sa dapit nga awaaw, unsa may gipaabot ninyo nga makita? …

“Kinsa man ka Jesus?”, pangutana ni Juan didto sa iyang bilanggoan. “Kinsa man kini si Juan?”, pangutana ni Jesus ngadto sa mga tawo. Si Jesus mismo adunay tubag: Si Juan tawo ba nga luho sa pamiste nga atua magpuyo sa usa ka palasyo? Dili. Apan siya propeta. Ug labaw pa niana. 9 ...Oo, Sultihan ko kamo, nakita ninyo ang labaw pa sa usa ka propeta: 10Kay si Juan mao ang giingon sa kasulatan: ‘Ania ang akong sinugo, nagaingon ang Dios, ipadala ko siya una kanimo aron iyang andamon ang imong pagaagian.' 11Hinumdumi kini! Si Juan nga Magbubunyag labaw kang bisan kinsa nga natawo sukadmasukad. Apan siya nga labing ubos sa Gingharian sa langit labaw pa kaniya.” Si Jesus mikutlo sa Malachi 3:1 aron sa pagtug-an sa mga tawo kon kinsa si Juan. Sa iyang pagtug-an sa tawo kon kinsa si Juan, si Jesus mipadayag usab kon kinsa gayod usab Siya: Siya ang agianan nga gipangandaman ni Juan nga Magbubunyag.