H1Niadtong panahona mitungha si Juan nga Magbubunyag ug nagwali didto sa dapit nga awaaw sa Judea. 2Siya miingon, “Hinulsoli ug biyai ninyo ang inyong mga sala kay hapit na maghari ang Dios.” 3Si Juan mao ang gihisgotan ni propeta Isaias sa iyang pag-ingon: “May nagsinggit didto sa kamingawan: ‘Andama ninyo ang dalan alang sa Ginoo. Hawani ninyo ang iyang agian!” 4Ang sapot ni Juan hinimo gikan sa balhibo sa kamelyo; nagbakos siyag panit, ug ang iyang kalan-on dulon ug dugos. 5Nangadto kaniya ang mga tawo gikan sa Jerusalem ug sa tibuok lalawigan sa Judea, ug gikan sa kayuta­an nga kasikbit sa suba sa Jordan. 6Gisugid nila ang ilang mga sala ug gibunyagan sila niya didto sa suba sa Jordan. 7Sa pagkakita ni Juan nga may daghang Pariseo ug Saduseo nga nanuol kaniya aron pagpabunyag, miingon siya kanila: “Kamong mga bitin, kinsay nagsulti kaninyo nga makalikay kamo sa kasuko sa Dios nga hapit na moabot? 8Buhata ninyo ang mga butang nga magpaila nga namiya kamo sa inyong mga sala. 9Ug ayaw kamo paghunahuna nga dili kamo kasilotan pinaagi sa pag-ingon: ‘Si Abraham among amahan.' Sultihan ko kamo nga ang Dios makahimo niining mga batoha nga mga kaliwat ni Abraham! 10Andam na ang wasay aron iputol sa mga kahoy diha sa mga gamot; ang tanang kahoy nga dili mamungag maayong bunga pagaputlon ug isugnod sa kalayo. 11Nagabunyag ako kaninyo pinaagi sa tubig aron pagpakita nga naghinulsol kamo sa inyong mga sala; apan ang moanhi sunod kanako magabunyag kaninyo pinaagi sa Espiritu Santo ug sa kalayo. Siya mas gamhanan pa kay kanako, ug dili ako angay bisan gani sa pagbitbit sa iyang sapatos. 12Nagkupot siya sa nigo nga igpapalid aron paglain sa tanang mga lugas; iyang tigumon ang trigo didto sa iyang kamalig, apan ang uhot iyang sunugon sa kalayo nga dili mapalong!” Ang Ebanghelyo sa Ginoo.

oOo

KAHULOGAN SA EBANGHELYO (Mateo 3:1-12)

1Niadtong panahona mitungha si Juan nga Magbubunyag ug nagwali didto sa dapit nga awaaw sa Judea. 2Miingon siya, “Biyai ninyo ang inyong mga sala kay duol na ang Gingharian sa langit!” Usa kini ka labing gikinahanglang tagdon nga mensahe. Usa ka maayong balita: nga sa katapusan ra gayod moabot ang paghari sa Dios. Unsa kaha ang kahikurat sa mga tawo nga nakadungog niini. Nahinumduman sa mga katawhan niadtong panahona ang mga saad sa Balaang Basahon mahitungod sa umaabot nga Mesiyas (Isaias 11:1-10).

Tinuod gayod nga mao kini ang Maayong Balita nga iwali mismo ni Cristo ngadto sa mga katawhan sulod sa duha ka tuig (Mt 4:17). Tinuod gayod nga haduol ang Ginoo. Ang Ginoo nakig-uban sa pagpuyo sa mga katawhan. Si San Juan nga Magbubunyag mao ang unang nagwali niini! Ato bang gibiyaan ang sala tungod kay nasayod kita nga ania na kita sa panahon nga Iya sa Dios? 3Si Juan mao ang gi­hisgotan ni propeta Isaias sa iyang pag-ingon: “Didto sa awaaw may nagasinggit: ‘Andama ninyo ang dalan sa Ginoo. Pagbuhat kamog tul-id nga dalan nga iyang agian!” Tan-awa kon kinsa kita kon atong itandi ang atong panahon karon ug sa kaniadto. Sila mihimog mga lisod nga mga buluhaton aron lamang ilang maandam ang agianan sa Dios. Apan kita? Usahay nagpakasayon lamang. Walay igong panumbaling. Mora'g gipakasayon ang pagkinabuhi isip Kristyanos.

Aduna ba kitay gihimong pagsakripisyo? O kaha kontento lamang kita sa naandang way-pagpakabana, way-pagpakiglabot. 4Ang sapot ni Juan hinimo gikan sa balhibo sa kamelyo; nagbakos siyag panit, ug ang iyang kalan-on dulon ug dugos. Tan-awa si Juan kon unsa gayod siya. Nagmaisugon siya sa iyang gipamulong ug sa iyang gibuhat. Wala siya magpakasayon sa iyang paagi sa pagkinabuhi. Gipuy-an niya ang kalisod tungod sa usa ka krusada, usa ka pagtuo. 5Nangadto kaniya ang mga tawo gikan sa Jerusalem ug sa tibuok lalawigan sa Judea, ug gikan sa kayuta­an nga kasikbit sa suba sa Jordan. Ang kamingawan nahimong puno sa mga katawhan. Nahimong buhi ang mamingawng dapit. Ang Jordan nahimong tagbuanan sa bagang panon sa mga tawo nga nagagikan sa kalainlaing mga dapit aron lamang maminaw sa mensahe ug magpabunyag ni Juan.

6Gisugid nila ang ilang mga sala ug gibunyagan sila niya didto sa suba sa Jordan. Mao kini ang espiritu sa Adbiyento kon atong pamalandongan ang nahitabo sa kamingawan ang pag-angkon sa atong mga kasal-anan uban sa pagpaubos. Gihagit kita sa panahon sa Adbiyento sa pag-usab sa atong kinabuhi gikan sa pagkadautan ngadto sa pagkamaayo. Ang Adbiyento maoy panahon dili sa pagdamgo kon dili sa pagpahimutang sa usa ka paghukom sa pag-usab o pagbag-o. Panahon karon nga kita makakumpisal! Kanus-a ba ang katapusan natong pagkumpisal? 7Sa pagkakita ni Juan nga may daghang Pariseo ug Saduseo nga nanuol kaniya aron pagpabunyag, miingon siya kanila: “Kamong mga bitin, kinsay nagsulti kaninyo nga maka­likay kamo sa kasuko sa Dios nga hapit na moabot? 8Buhata ninyo ang mga butang nga magpaila nga namiya kamo sa inyong mga sala. 9Ug ayaw kamo paghunahuna nga dili kamo kasilotan pinaagi sa pag-ingon: ‘Si Abraham among amahan...'

Aduna diay gayoy mga tawo nga magpabilin sa ilang karaang nahimutangan: dili mag-usab, dili molihok. Dako ra kaayo ang ilang pagsalig sa kaugalingon, nga dili sila masilotan. Mao nga magdumili gayod sila sa pag-usab o pagbag-o. 10Andam na ang wasay aron iputol sa mga kahoy diha sa mga gamot; ang tanang kahoy nga dili mamungag maayong bunga pagaputlon ug isugnod sa kalayo. Dinhi mabati kanato ang pagka-dinalian gayod sa atong pagtubag sa hagit ni San Juan. Putlon kadtong walay kapuslanan, sama sa kahoy nga walay bunga. 11Naga­bunyag ako kaninyo pinaagi sa tubig aron pagpakita nga naghinulsol kamo sa inyong mga sala; apan ang moanhi sunod kanako magabunyag kaninyo pinaagi sa Espiritu Santo ug sa kalayo. Siya mas gamhanan pa kay kanako, ug dili ako angay bisan gani sa pag­bitbit sa iyang sapatos.

Gikan sa mga ngabil mismo ni San Juan atong mabati nga ang gisulti dili lamang kay nagpakita sa iyang kamapaubsanon kon dili sa iyang pagbaton og dakong pagtuo. 12Nagkupot siya sa nigo nga igpapalid aron paglain sa tanang mga lugas; iyang tigumon ang trigo didto sa iyang kamalig, apan ang uhot iyang sunugon sa kalayo nga dili mapalong!” Mao kini ang naandang larawan sa bibliya mahitungod sa Adlaw sa Paghukom. Kining adlawa Iya lamang gayod sa Ginoo. Unya sa paghukom bahinbahinon ang trigo ug ang uhot—ang maayo gikan sa dautan. Ang maayo tigumon. Samtang ang dautan sunugon.