Discover Bohol - Bohol Tours - Chocolate Hills - Panglao Beaches - Alona - Python - Sandugo - Baclayon Church - Balicasag
Bohol Sunday Post - Bohol Newspaper - Bohol news online - Bohol online news - Bohol latest news - Bohol news update - Bohol breaking news - What's happening in Bohol
Tagbilaran - Bohol - Telephone Directory
VOLUME XXVIII No. 21
Tagbilaran City, Bohol, Philippines
December 1, 2013 issue
advertisement
-
-
ARCHIVED ISSUES
Bohol Realty - Panglao beach property - affordable house and Lot - overlooking view - commercial property - investment property - Bohol beach property

EBANGHELYO (Mateo 24:37-44)

 

Si Jesus miingon sa iyang mga tinun-an: 37“Ang pag-abot sa Anak sa Tawo mahisama sa nahitabo sa panahon ni Noe. 38Ingon sa mga adlaw sa wala pa ang Lunop, ang mga tawo nagpadayon pagpangaon ug pagpanginom, ug ang mga lalaki ug ang mga babaye nagminyoay, hangtod gayod sa adlaw nga misulod si Noe sa arka; 39apan wala sila masayod sa nahitabo hangtod nga ang Lunop miabot ug mibanlas kanilang tanan. Ingon unya niini ang mahitabo inig-abot sa Anak sa Tawo. 40Niadtong pana­hona may duha ka tawo nga magtrabaho didto sa uma: ang usa kuhaon, ug ang usa ibilin. 41May duha ka babaye nga maggaling ug pag­kaon: ang usa kuhaon, ug ang usa ibilin. 42Busa pagbantay kamo, kay wala kamo ma­sayod kon unsang adlawa moanhi ang Ginoo. 43Hinumdomi kini! Kon ang agalon sa panimalay nasayod pa sa takna nga iabot sa kawa­tan, magatukaw gayod siya ug dili motugot nga ang kawatan molungkab sa balay. 44Busa kamo usab kinahanglan mag-andam kanunay, kay ang Anak sa Tawo moabot sa takna nga wala kamo magpaabot kaniya. Ang Ebanghelyo sa Ginoo.

oOo

KAHULOGAN SA EBANGHELYO (Mateo 24:37-44)

Si Jesus miingon sa iyang mga tinun-an: 37“Ang pag-abot sa Anak sa Tawo mahisama sa nahitabo sa panahon ni Noe. Ania na kita sa Adbiyento! Kining maong pulong gikan sa Latin nga “adventum”, nga nagkahulogan og “pag-abot”. Mao kini ang tema sa Ebanghelyo: Nga adunay usa ka tawo nga moabot. Si Jesus wala mopaila sa iyang kaugalingon nga usa ka tawo sa miaging panahon, apan isip usa ka tawo sa umaabot nga panahon. Naghisgot siya sa iyang paghiabot isip usa ka panghitabo nga umaabot pa. 38Ingon sa mga adlaw sa wala pa ang Lunop, ang mga tawo nagpadayon pagpangaon ug pagpanginom, ug ang mga lalaki ug ang mga babaye nagminyoay, hangtod gayod sa adlaw nga misulod si Noe sa arka…

Nganong balikan man nato ang dugay nang panghitabo sa kasaysayan sama sa dakong lunop sa panahon ni Noe? Unsa man diay kini alang kanato? Kana tungod kay si Jesus nakakita nga bisan sa atong panahon karon maora lang ta gihapon sa panghitabo sa panahon ni Noe—kita mga “busy”. Dili ba kini ang atong kanunay nga ibalibad: “Daghan ko'g trabaho, bay!” o “Wa koy panahon, bay!” o “Labhihang busyha ko karon, bay!”

Apan aron gayod atong masayran, tan-awa sa Genesis 6:5-13, masabtan nato nga ang maong dakong lunop mao diay ang silot sa mga hilabihang pagpakasala sa mga tawo niadtong panahona. Apan sa pagsulti pa ni Jesus niini wala gayoy dinagkong mga pagpakasala sa mga tawo. Ang ilang gihimo mao ra ang pagkaon, pag-inom ug pagminyoay. Unsa man diay kaha ang ilang sayop? 39aapan wala sila masayod sa nahitabo hangtod nga ang Lunop miabot ug mibanlas kanilang tanan.

Ang hinungdan diay ngano nga si Jesus mibadlong kanila dili tungod sa sala o sa ilang pagpalabi og kaon o inom, kondili tungod kay “wala sila masayod”. Sa ato pa wala sila magdahom nga adunay usa ka panghitabo nga angayan untang pangandaman. Hinoon nagpadayon lamang sila sa ilang matag adlaw nga buluhaton ug wala nila mahatagi og dakong pagtagad ang pagpakabana sa presensya sa Dios ug sa pagtabang sa ilang mga silingan. Dili ba atong mga gikabusyhan usahay kadto man hinoong mga butang nga matawag nato og dili kaayo mahinungdanon. Wala hinoon matagad ang mga mahinungdanon—sama sa pagkab-ot og kahulogan ug kahingpitan sa atong pagkinabuhi. 39bIngon unya niini ang mahitabo inig-abot sa Anak sa Tawo. Ang pulong inig-abot nga sa Griego “Parousia” nagkahulogan og “presensya”. Sa ato pa, sa iyang pag-abot anaa ka, anaa ka sa iyang kiliran. Sa maong panahon ang parousia mao ang panahon atol sa opisyal nga pagduaw sa Hari o Emperador.

Usahay nagtuo ta nga ang parousia mao ang ikaduhang pag-abot ni Cristo sa katapusan sa panahon. Sa ato pa, layo pa diay kini kaayo. Niining maong sayop nga pagsabot nga si Cristo mipasidaan kanila nga dili unta kita maghulat sa katapusan pang panahon. Si Cristo makigtagbo kanato taliwala sa atong kabusy—sa panahon nga atong gihimo ang mga inadlawng adlaw mga buluhaton. Siya makigtagbo kanato diha sa atong mga buluhaton sulod sa atong tagsatagsa ka balay, sa atong pakig-uban sa atong mga silingan, diha sa atong mga umahan, panagatan, gitrabaho-an, sa atong katilingban, sa atong simbahan ug uban pa. 40Niadtong pana­hona may duha ka tawo nga magtrabaho didto sa uma: ang usa kuhaon, ug ang usa ibilin... Diha diay sa atong pag-atiman sa atong mga naandang mga buluhaton nga si Jesus makigtagbo kanato. 42Busa pagbantay kamo, kay wala kamo ma­sayod kon unsang adlawa moanhi ang Ginoo. Si Jesus mipasidaan sa atong pagka-makanunayong pagbantay! Ang pag-abot ni Cristo usa ka matag-adlaw nga panghitabo!

Dinhi ang dakong kalainan. Duha ang anaa sa umahan. Ang una andam. Ang ika-duha wala mangandam. Ang una nagtrabaho “uban sa Dios”. Ang ikaduha, nagtrabaho nga “wala ipauban ang Dios”. Ang una anaa sa kahayag, samtang ang ikaduha anaa sa kangitngit. Kumusta man ang atong pagpa-ngandam? 43aHinumdomi kini! Kon ang agalon sa panimalay nasayod pa sa takna nga iabot sa kawa­tan, magatukaw gayod siya… Dili nato usikan ang kinabuhi! Kinahanglan ang makanunayong pagtukaw. Ang pagtukaw maoy usa ka pagpuyo sa usa ka kinabuhi nga nangita sa kahingpitan (fullness of life). Ang pagtukaw dili mao ang paglikay aron walay kadaot nga mahitabo. Kondili mao ang pakigbisog o pakig-asdang sa mga kalisdan o suliran sa paagi nga subay sa atong pagtuo kang Cristo. Ang pagtukaw mao ang paghimog usa ka aksyon nga subay sa kabubut-on sa Dios.

Ang walay pagpangandam mao ra ba ang hinungdan nga kita moingon sa kaulaihan og“apat”—”kon nasayod pa lang unta ako!” Pagtukaw aron dili moabot ang “apat”. 43bug dili motugot nga ang kawatan mo-lungkab sa balay. Kawatan. Usa ka talan-awon nga nagdala og kahadlok. Aduna ba diay kahadlok niining maong pagtukaw? Ang kawatan man god mosulay gayod sa pagbukas sa unsay gisiradohan. Mao diay kini ang gipasabot ni Cristo: Nga si Cristo makabukas usab sa atong pagka-sirado. Sa Iyang pag-abot kadto lamang nagtukaw ug nangandam nga makabukas sa siradong pultahan aron siya makasulod. Ang paghukom kon ato pa Siyang pasudlon anaa ra sa matag usa kanato!

Apan, subo gayod kadtong mga tawo nga sa iyang pagtuktok sa pultahan dili makabukas niini kay sila wala magtukaw, wala mangandam, wala magtuo nga si Cristo diay ang miabot ug nanuktok. Ato bang palabyon ang kahigayonan nga si Cristo makighinagbo kanato? Ato bang sirhan ang kahigayonan nga bisan ania pa kita sa kalibutan, Iya na kitang pasination sa pasiunang kabuhong nga langitnon? 44Busa kamo usab kinahanglan mag-andam kanunay, kay ang Anak sa Tawo moabot sa takna nga wala kamo magpaabot kaniya.” Ang tinuod nga mga Kristyanos dili mahingawa kabahin sa pakig-appointment sa Ginoo. Kay sa tanang panahon ug diha sa atong pag-atiman sa atong matag adlaw nga buluhaton, anaa ang kahigayonan sa pakigtagbo sa atong Dios. Ang iyang pag-abot ipaagi sa tumang kayano. Sa panahon nga wala nato damha!

-
-
The Bohol Sunday Post, copyright 2006 - 2013, All Rights Reserved
For comments & sugestions please email: webmaster@discoverbohol.com