19Si Jesus miingon ngadto sa mga Pariseo: “May usa ka dato nga nagsul-ob sa labing mahal nga bisti ug nagpuyo nga luho kaayo. 20May usa usab ka kabus nga ginganlag Lazaro, kansang lawas nalukop sa mga nuka, ug pagadad-on siya ngadto sa pultahan sa balay sa dato, 21basin na lang makakaon siya sa mga mumho nga mangatagak gikan sa lamesa sa dato. Ug bisan ang mga iro manuol ug motilap sa iyang mga nuka. 22Unya namatay si Lazaro ug gidala sa mga anghel ngadto sa kiliran ni Abraham, didto sa kombira sa langit; ang dato usab namatay ug gilubong, 23ug nag-antus pag-ayo didto sa Hades. Unya miyahat siya ug iyang nakita si Abraham didto sa layo, ug si Lazaro sa tupad niya. 24Busa misinggit siya ngadto kang Abraham, ‘Amahan! Kaloy-i intawon ako, ug ipadala si Lazaro diri aron itunlob ang iyang tudlo sa tubig ug pabugnawan ang akong dila, kay nag-antus ako pag-ayo sa kainit niining kalayo!’ 25Apan si Abraham mitubag, ‘Anak, hinumdomi nga sa didto ka pa sa kalibutan, nabuhong ka sa tanang maayong butang, samtang si Lazaro lunlon lamang dautan ang nahiagoman. Apan karon malipayon na siya diri, samtang ikaw diha nag-antus. 26Gawas pa niana, anaay lawom nga bung-aw nga nag-ulang kanato, aron kadtong buot motabok nganha kanimo gikan diri dili makahimo, ni ang anaa diha makatabok ngari kanamo. 27Ang dato mitubag, ‘Kon mao kana, Amahan, hangyoon ko ikaw nga imo untang ipadala si Lazaro ngadto sa amo, 28diin ako may lima ka igsuong lalaki. Paadtoa siya aron sila kapasidan-an ug dili mahianhi niining dapit sa kasakitan.’ 29Si Abraham miingon, ‘Atua didto si Moises ug ang mga propeta nga magpasidaan kanila; sila nay mahibalo sa pagpamati sa ilang isulti.’ 30Ang dato mitubag, ‘Apan Amahan, kana dili pa igo! Kon adunay mabanhaw ug moadto kanila, mamiya gayod sila sa ilang mga sala.’ 31Apan miingon si Abraham, ‘Kon dili sila mamati kang Moises ug sa mga propeta, dili gayod sila makabig bisan pag may mabanhaw.’” Ang Ebanghelyo sa Ginoo.

oOo

KAHULOGAN SA EBANGHELYO (Lukas 16:19-31)

19Si Jesus miingon ngadto sa mga Pariseo: “May usa ka dato nga nagsul-ob sa labing mahal nga bisti ug nagpuyo nga luho kaayo. Namatikdan na ni Jesus bisan sa iyang panahon: Anaay mga dato ra kaayo, anaay kabus ra usab kaayo. 20May usa usab ka kabus nga ginganlag Lazaro, kansang lawas nalukop sa mga nuka... Ang dato walay ngalan. Tingali hinganlan nato siyag “kaugalingon”. Apan ang kabus may ngalan: Lazaro. Kining ngalana sa Hebreo mao ang El’azar, nga nagkahulogan og “Ang Dios mitabang”. Mao ra kini ang sambingay diin ang usa sa mga nahilambigit may ngalan! 21basin na lang makakaon siya sa mga mumho nga mangatagak gikan sa lamesa sa dato. Ug bisan ang mga iro manuol ug motilap sa iyang mga nuka. Adunay drama diha sa paghulagway ni Jesus: sa sulod sa balay anaa ang daghang pagkaon ug luhong panimuyo; samtang sa gawas, anaa ang tumang kaalaot ug kahimtang nga patay-gutom. 22Unya namatay si Lazaro ug gidala sa mga anghel ngadto sa kiliran ni Abraham, didto sa kombira sa langit; ang dato usab namatay ug gilubong, 23aug nag-antus pag-ayo didto sa Hades.

Dakong kabalit-ad sa hulagway. Ang kabus nga nag-antos samtang dinhi pa sa kalibutan, karon nagmalipayon! Samtang ang dato dinhi sa kalibutan, naglunang sa tumang kalisod! Wala kita sultihi nga ang kabus nagbaton og daghang maayong birtud ug ang dato dautan. Gitug-anan lamang kita nga ang usa “dato”, samtang ang usa “kabus”. Ang dato wala usab magbuhat og kadaot o panglupig sa kabus. Gisaysay lamang niining sambingay nga ang dato wala magpakabana sa kabus! Iyang gipahimugso ang dakong bung-aw nga maoy nakapalayo kaayo kanilang duha. 23b ...Unya miyahat siya ug iyang nakita si Abraham didto sa layo, ug si Lazaro sa tupad niya. 24Busa misinggit siya ngadto kang Abraham, ‘Amahan! Kaloy-i intawon ako, ug ipadala si Lazaro diri aron itunlob ang iyang tudlo sa tubig ug pabugnawan ang akong dila, kay nag-antus ako pag-ayo sa kainit niining kalayo!’ Ang puloy-anan sa laing kinabuhi gilarawan nga “dapit--puy-anan sa mga patay” o Sheol diin anaa ang mga lawas, tudlo, kalayo, tubig. Usa kini ka dapit diin anaa ang panaglayo tali niadtong mga pinili ug niadtong mga sinilotan. Usa ka dapit diin ang mga dato na mao ang nanginahanglan sa mga kabus!

25Apan si Abraham mitubag, ‘Anak, hinumdomi nga sa didto ka pa sa kalibutan, nabuhong ka sa tanang maayong butang, samtang si Lazaro lunlon lamang dautan ang nahiagoman. Apan karon malipayon na siya diri, samtang ikaw diha nag-antus. 26… anaay lawom nga bung-aw nga nag-ulang kanato, aron kadtong buot motabok nganha kanimo gikan diri dili makahimo... Pinaagi sa mga pulong ni Abraham, si Jesus makusganon nga mipasabot kabahin sa “pribihiliyo sa mga kabus”. Sa Ebanghelyo makit-an nato ang pagpili kang Jesus pabor sa mga kabus (Lukas 1:53; 4:18; 6:20, 24; 12:15-21; 16:9-11). Si Jesus nasayod sa duha ka katalagman o kakuyaw sa kadato: Una. Motak-op kini sa kasingkasing ngadto sa Ginoo. Tungod kay anaa na man ang tanan niining kinabuhia, makalimot hinoon sa sunod pang kinabuhi. Ikaduha. Motak-op kini sa kasingkasing ngadto sa isigkatawo. Mao nga ang dato daw wala makakita sa kabus nga nagkamang sa iyang ubos nga nahimutangan. Ang Impyerno mao diay ang dapit nga halayo ang Ginoo ug halayo ang isigkatawo. Kita ra usab ang nagmugna sa atong kaugalingong langit kon dinhi sa yuta haduol na kita sa Dios ug sa isigkatawo.

27Ang dato mitubag, ‘Kon mao kana, Amahan, hangyoon ko ikaw nga imo untang ipadala si Lazaro ngadto sa amo, 28diin ako may lima ka igsuong lalaki. Paadtoa siya aron sila kapasidan-an ug dili mahianhi niining dapit sa kasakitan.’ Ang pakiluoy sa dato naghulagway sa hilabihang kapait sa iyang nahimutangan! 29Si Abraham miingon, ‘Atua didto si Moises ug ang mga propeta nga magpasidaan kanila; sila nay mahibalo sa pagpamati sa ilang isulti.’ 30Ang dato mitubag, ‘Apan Amahan, kana dili pa igo! Kon adunay mabanhaw ug moadto kanila, mamiya gayod sila sa ilang mga sala.’ Laing sanglitanan sa “paghangyo og kahibulongang ilhanan”. Milagro aron kami mutuo! Ang tawo mutuo lamang kon adunay ilhanan! Apan makadaghan si Jesus wala gayod mobuhat og mga dinagkong ilhanan (Lukas 11:16-29; Markos 8:11-12, Mateo 12:38; 16:1). 31Apan miingon si Abraham, ‘Kon dili sila mamati kang Moises ug sa mga propeta, dili gayod sila makabig bisan pag may mabanhaw.’ ” Sa tinuod, ang pagkabanhaw ni Lazaro, ang igsoon nila ni Marta ug Maria sa Betania, wala gayod makapatuo sa mga Pariseo ug mga punuang-pari, hinoon maoy nakapatukmod nila sa pagsalikway kang Jesus. Ang tinuod nga pagtuo wala magsukad sa milagro, kondili sa kinasingkasing ug tinuoray nga pagpamati sa Pulong sa Ginoo.

Mangutana kita sa atong kaugalingon: Kinsay Dato? Kinsay Kabus?