Usa niana ka higayon may daghang mga kobrador sa buhis ug mga makasasala nga miadto kang Jesus aron pagpamati kaniya. 2Unya ang mga Pariseo ug ang mga magtutudlo sa Balaod nagbagulbol nga nag-ingon, "Kining tawhana nag-abi-abi sa mga makasasala ug nakigsalo pa gani kanila!” 3Tungod niini misugilon kanila si Jesus og usa ka sambingay: 4“Pananglit usa kaninyo may usa ka gatos ka karnero ug nawala ang usa niini, unsa may iyang buhaton? Iyang biyaan ang kasiyamag-siyam didto sa sibsibanan, ug pangitaon niya ang nawala nga karnero hangtod nga kini iyang makaplagan. 5Ug inigkakaplag niya niini, malipay siya pag-ayo ug iya kining pas-anon, 6ug dad-on pagbalik ngadto sa ila. Unya iyang dapiton ang iyang mga higala ug mga silingan, ug moingon siya kanila; 'Maglipay kita kay akong nakaplagan ang nawala kong karnero!’ 7Sa ingon usab niini, sultihan ko kamo nga mas dako ang kalipay didto sa langit tungod sa usa ka makasasala nga maghinulsol, kay sa kasiyamag-siyam ka tawo nga matarong nga wala magkinahanglan nga maghinulsol.” 8"O pananglit usa ka babaye nga may napulo ka tagsa ka dako kawad-an og usa, unsa may iyang buhaton? Magdagkot siya og suga ug manilhig sa iyang balay, ug iya kining pangitaon pag-ayo hangtod makaplagan. 9Ug inigkakaplag niya niini, tawgon niya ang iyang mga higala ug mga silingan, ug moingon siya kanila, 'Maglipay kita, kay akong nakaplagan ang nawala kong usa ka dako!’ 10Sa ingon usab niini, sultihan ko kamo nga mangalipay ang mga anghel sa Dios tungod sa usa ka makasasala nga maghinulsol.” Ang Ebanghelyo sa Ginoo.

oOo

KAHULOGAN SA EBANGHELYO (Lukas 15:1-10)

1 … mga kobrador sa buhis ug mga makasasala nga miadto kang Jesus... 2Unya ang mga Pariseo ug ang mga magtutudlo sa Balaod nagbagulbol… "Kining tawhana nag-abi-abi sa mga makasasala…” 3Tungod niini misugilon kanila si Jesus og usa ka sambingay:

Kining mga pulonga mao ang pasiuna sa mga tulo ka “sambingay sa kaluoy”: ang karnero nga nawala ug nakaplagan, ang usa ka dako nga nawala ug nakaplagan, ug ang Anak nga nawala ug nakaplagan. Si Jesus misugilon niini aron sa pagpanalipod sa iyang baroganan sa iyang pagpakig-uban sa mga “makasasala” nga nakapakurat sa mga Pariseo ug mga magtutudlo sa Balaod.

4“Pananglit usa kaninyo may usa ka gatos ka karnero ug nawala ang usa niini, unsa may iyang buhaton? Iyang biyaan ang kasiyamag-siyam didto sa sibsibanan, ug pangitaon niya ang nawala nga karnero hangtod nga kini iyang makaplagan.

Si Jesus nanukad sa mga kasinatian ug panghunahuna sa iyang mga tigpaminaw: “Unsa may iyang buhaton?” Sa tinuoray, wala gayoy magbalantay sa mga karnero nga motugot nga mawad-an bisag usa lang sa iyang panon.

Ang mga manggialamon o philosophers mipasupot sa panghunahuna kabahin sa “Dios nga dili mabalhinon” o “permanent God”. Apan si Jesus mipasupot og kamatuoran bahin sa Dios nga naglihok—nangita sa mga nawala hangtod nga makaplagan!

5Ug inigkakaplag niya niini, malipay siya pag-ayo ug iya kining pas-anon…

Usa ka dalaygong talan-awon! Gilarawan sa daghang mga pagpintura o kwadro sukad pa sa unang siglo: magbalantay nga nagbaton og kasanag nga panagway nga nagpas-an sa iyang mga abaga og usa ka karnero (good shepherd). Ang maong hulagway nagalarawan sa Dios.

Dili kini bag-o nga imahen sa Dios. Sa Daang Tugon mabasa na nato ang maong paglarawan (Isaias 40:11, 49:10, ug uban pa). Sa Salmo 23 mabasa kanato: “Nagbantay kanako ang Ginoo, walay makulang kanako.”

6ug dad-on pagbalik ngadto sa ila. Unya iyang dapiton ang iyang mga higala ug mga silingan, ug moingon siya kanila; 'Maglipay kita kay akong nakaplagan ang nawala kong karnero!”

Gibati sa tumang kalipay ang magbalantay nga iya gayod nga ipaambit ang maong kalipay ngadto sa iyang mga silingan. Pagkadakog kalainan sa pagbati sa mga eskriba ug Pariseo nga nagdumili sa pagdawat sa mga makasasala.

7Sa ingon usab niini, sultihan ko kamo nga mas dako ang kalipay didto sa langit tungod sa usa ka makasasala nga maghinulsol, kay sa kasiyamag-siyam ka tawo nga matarong nga wala magkinahanglan nga maghinulsol.

Ang kalipay sa Dios nagasukad sa kamatuoran nga dili gayod siya mohukom batok sa mga makasasala. Ang makasasala mismo mao ang nagahukom batok sa iyang kaugalingon tungod sa iyang pagka gawasnon!

Hilabihan ang kalipay sa Dios bisan kon usa lamang ang nagbasol. Kabubut-on sa Dios nga mahilayo ang kalibutan gikan sa bisan unsa ka gamay nga tipik sa pagkadautan!

Mao kini ang giingon og “pagka-buangbuangon nga paghigugma sa Dios sa iyang katawhan” (stupendous Love of God)!

8"O pananglit usa ka babaye nga may napulo ka tagsa ka dako kawad-an og usa, unsa may iyang buhaton? Magdagkot siya og suga ug manilhig sa iyang balay, ug iya kining pangitaon pag-ayo hangtod makaplagan.

Bisan pa kon susama ang kamatuoran nga buot makat-onan nato kang Jesus niining maong sambingay, apan kini nagpakita og laing angulo sa atong pagkatawo: ang angulo sa kahimtang sa pagka-kabus.

9Ug inigkakaplag niya niini, tawgon niya ang iyang mga higala ug mga silingan, ug moingon siya kanila, 'Maglipay kita, kay akong nakaplagan ang nawala kong usa ka dako!’

Kabus ang maong babaye. Wala siya manag-iya og usa ka gatos (100) ka mga karnero. Ang anaa kaniya napulo (10) lamang ka “usa-ka-dako” (ten coins). Ang matag usa-ka-dako maoy sweldo sa matag adlaw sa mga tigtikad sa umahan (Mateo 20:2). Bisan unsa ka gamay sa nawala nga nakaplagan, ang babaye mipaambit gayod sa iyang kalipay.

Ingon usab niini ang Ginoo. Tingali wala pa gayod nato sa hingpit matugkad kining maong kalipay sa Ginoo. Angay natong mahibaloan nga mao kini ang gipasabot sa pulong “Maayong Balita”.

Kabubut-on sa Dios nga unta ang tanan makaplagan aron maluwas!

10Sa ingon usab niini, sultihan ko kamo nga mangalipay ang mga anghel sa Dios tungod sa usa ka makasasala nga maghinulsol.”

Laing maanindot nga talan-awon: Ang langit nga masadyaong nagsaulog. Ang kalipay sa Dios manakod. Natakdan bisan gani ang mga anghel. Ang hinungdan? Tungod lamang sa usa ka makasasala nga nagbasol!

Si Jesus misukna og kausaban ug kabag-ohan sa matag usa kanato (Markos 1:15). Apan inubanan kini sa gugma!