38Samtang nagpadayon pagpanaw si Jesus ug ang iyang mga tinun-an, nahiabot sila sa usa ka balangay diin may usa ka babaye nga ginganlag Marta nga miabiabi kaniya didto sa iyang balay. 39May igsoon siyang babaye nga ginganlag Maria, nga naglingkod sa tiilan sa Ginoo ug namati sa iyang gitudlo. 40Si Marta nagkapuliki sa daghan niyang buluhaton, busa miduol siya ug miingon, “Ginoo, dili ka ba manumbaling nga gipasagdan man lamang ako sa akong igsuon sa tanang buluhaton sa balay? Agdaha siya pag-ari aron pagtabang kanako." 41Ang Ginoo mitubag kaniya, "Ay, kanimo, Marta! Naguol ug nahingawa ka sa daghang mga butang 42nga unta usa ra man ang gikinahanglan. Nakapili si Maria sa labing maayo, ug walay makakuha niini gikan kaniya.” Ang Ebanghelyo sa Ginoo

oOo

KAHULOGAN SA EBANGHELYO (Lukas 10:38-42)

38aSamtang nagpadayon pagpanaw si Jesus ug ang iyang mga tinun-an, nahiabot sila sa usa ka balangay... Dili nato hikalimtan ang kinaiya sa “dalan” (the way) nga atong giagian uban ni Jesus. Usa pa kini ka “dalan” padulong ngadto sa Jerusalem, ug mao kini ang gihatagan og dakong pagtagad ni San Lukas diha sa iyang saysay sa Ebanghelyo. Migugol siya og napulo ka mga ulohan o kapitulo alang niini (gikan sa Lukas 9:52 ngadto sa 19:28).

Sa ika-13 nga Domingo sa tuig nakita nato ang paglusad ni Jesus sa iyang makasaysayanong panaw padulong sa Jerusalem (Lukas 9:51) human siya ilha nga mao ang Mangluluwas o Messiah. Sa ika-14 nga Domingo, nasaksihan nato ang pagpadala ni Jesus sa kapitoan ug duha (72) ka mga tinun-an ngadto sa misyon (Lukas 10:1-20). Sa miaging Domingo, ika-15 nga Domingo, si Jesus didto sa dalan sa Jericho, katloan ka kilometro gikan sa Jerusalem, nga nagsaysay sa sambingay sa maayong Samaryanhon (Lukas 10:25-37). Sa atong pagbasa niining Domingoha, ania kita sa Betania, tulo ka kilometro gikan sa sentro sa Jerusalem. Samtang wala si Jesus dawata sa Samaria, dinhi sa Betania nasinati niya ang pagkamaabiabihon sa usa ka banay. Usa ka banay nga suod kaayo kang Jesus. 38b… may usa ka babaye nga ginganlag Marta nga miabiabi kaniya didto sa iyang balay. 39aMay igsoon siyang babaye nga ginganlag Maria…

Kining duha ka mga igsoong babaye adunay usa ka igsoong lalaki nga ang ngalan Lazaro. Sulod sa tulo ka mga higayon nga ang Ebanghelyo milarawan kanila, diin ang ilang mga kinaiya atong tataw nga nasayran. Sa mubong pamahayag, si Juan misulat: “Suod si Jesus ni Marta, ni Maria, ug ni Lazaro (Juan 11:5). Sa panahon nga namatay si Lazaro “mihilak si Jesus” (Juan 11:35). Sa laing higayon samtang naghikay silag panihapon alang kang Jesus, “si Marta maoy nagsilbi, samtang si Lazaro usa sa mga mitambong sa kan-anan… Unya si Maria mikuhag tunga ka kilong pahumot nga mahal kaayo, ug gibubo niya kini sa tiil ni Jesus ug unya gipahiran sa iyang buhok (Juan 12:2-3). Si Jesus nakabaton og tinuod nga mga higala—ug uban niini mao ang mga babaye. Sa panimalay nila ni Marta, Maria ug Lazaro, si Jesus nagkanunayan sa pagduaw matag gabii sa katapusang semana una pa siya patya (Mt 21:7, 22:6; Mk 11:11; Jn 11:1-18, 12:1; ug Lk 12:2-3). Uban sa maong banay si Jesus nakasinati sa matuod ug maayong paghinigalaay.

39b … nga naglingkod sa tiilan sa Ginoo ug namati sa iyang gitudlo. 40aSi Marta nagkapuliki sa daghan niyang buluhaton…

Si Jesus nakighinabi kang Maria nga naglingkod sa iyang tiilan. Si Maria naminaw. Unsay ilang gipanagsultihan wala mahisulat sa Ebanghelyo. Apan atong maaninaw nga mahinungdanon gayod kadto—sama sa iyang gipaabot nga kasakitan ug kamatayon sa Jerusalem. 40bbusa miduol siya ug miingon, “Ginoo, dili ka ba manumbaling nga gipasagdan man lamang ako sa akong igsuon sa tanang buluhaton sa balay? Agdaha siya pag-ari aron pagtabang kanako." Ang interbensyon ni Marta nagpakita sa kalainan sa ilang mga kinaiya. Apan angay gayod nga atong tan-awon si Marta uban sa dakong pagdayeg. Matinabangon si Marta diha sa iyang pagpangalagad. Si Jesus mismo ang mipahinumdum kanato sa gipamulong sa Hari, “Umari kamo nga gipanalanginan sa akong Amahan ug dawata ninyo ang Gingharian nga giandam alang kaninyo sukad pa sa pagbuhat sa kalibutan. Gigutom ako ug inyo akong gipakaon; giuhaw ako ug inyo akong gipainom; dumuduong ako ug inyo akong gidawat sa inyong mga balay (Mateo 25:34-35).

41Ang Ginoo mitubag kaniya, "Ay, kanimo, Marta! Naguol ug nahingawa ka sa daghang mga butang Nakita ni Jesus nga si Marta nagkapuliki, naguol ug nahingawa sa daghang mga butang. Usa kini ka paborito nga tema ni Jesus. Miingon siya nga ang atong mga kabalaka, bahandi ug kahilayan niining kalibutana makatuok sa pulong sa Dios (Lukas 8:14). Inay nga paharion ang kabalaka sa mga gagmayng butang, atong dugangan og dakong pagtagad ang unsay labing mahinungdanon. 42nga unta usa ra man ang gikinahanglan. Nakapili si Maria sa labing maayo, ug walay makakuha niini gikan kaniya.” Ang labing mahinungdanon mao ang usa nga gikinahanglan. Ug si Maria nakapili niini: Ang paglingkod sa tiilan ni Jesus aron sa pagpaminaw kaniya. Kinahanglan diay ang makanunayong pagpaminaw kang Jesus. Kini atong mahimo sa pagpamalandong sa iyang mga Pulong diha sa bibliya, sa pag-ampo, ug sa pagtuman niini sa atong kinabuhi!