25Unya miduol ang usa ka magtutudlo sa Balaod ug misulay pagbitik kang Jesus. Nangutana siya, "Magtutudlo, unsay kinahanglan kong buhaton aron ako makadawat sa kinabuhing dayon? 26Si Jesus mitubag kaniya, "Unsa may giingon sa Kasulatan? Ug giunsa man nimo kini pagsabut?" 27Ang magtutudlo sa Balaod mitubag, “‘Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong kusog, ug sa tibuok mong hunahuna,’ug 'Higugmaa ang imong isigkatawo ingon sa paghigugma mo sa imong kaugalingon.’ ” 28Mitubag si Jesus, "Husto ang imong tubag; buhata kana ug makadawat ka sa kinabuhi.” 29Apan ang magtutudlo sa Balaod buot ilhon nga husto siya, ug mao nga nangutana siya kang Jesus, "Kinsa ba diay ang akong isigkatawo?" 30Si Jesus mitubag, "May usa ka tawo nga milugsong gikan sa Jerusalem ngadto sa Jerico, ug gibanhigan siya sa mga tulisan. Gihuboan nila siya, gibun-og, ug gibiyaan nga himatyon. 31Ug nahitabo nga may usa ka pari nga miagi niadtong dalana; sa pagkakita niya sa tawo, milabay lamang siya agi sa pikas daplin. 32Unya nahiagi usab ang usa ka Levita, ug miduol siya ug mitan-aw sa tawo, ug unya misaylo lamang agi sa pikas daplin. 33Apan may usa ka Samaryanhon nga nagpanaw niadtong dalana nahiagi sa gitulisan, ug sa pagkakita niya sa tawo, naluoy siya. 34Miduol siya kaniya, ug gibuboan niyag lana ug bino ang iyang mga samad ug gibugkosan; unya gipasakay niya ang tawo sa iyang hayop ug gihatod ngadto sa usa ka abotanan, ug didto iyang gialimahan siya. 35Sa pagkaugma mihatag siyag duha ka denario ngadto sa tig-atiman sa abotanan ug mitugon, 'Galma siya ug inigbalik ko dinhi bayran ko ikaw sa imong magasto.’ ” 36Ug si Jesus mitapos pag-ingon, "Karon kinsa man niining tulo sa imong hunahuna ang nagpakita nga isigkatawo sa gitulisan?” 37Ang magtutudlo sa Balaod mitubag, “Kadtong naluoy kaniya.” Si Jesus miingon, “Busa lakaw ug buhata ang sama sa iyang gibuhat.” Ang Ebanghelyo sa Ginoo.

oOo

KAHULOGAN SA EBANGHELYO (Lukas 10:25-37)

25Unya miduol ang usa ka magtutudlo sa Balaod ug misulay pagbitik kang Jesus. Nangutana siya, "Magtutudlo, unsay kinahanglan kong buhaton aron ako makadawat sa kinabuhing dayon? Sa panahon ni Jesus, dili kini usa ka yano nga pangutana alang sa mga Judio. Ang mga Pariseo mituo sa kinabuhing umabot ug sa pagkabanhaw sa mga minatay, apan ang mga Saduceo wala motuo niini. Bisan sa atong modernong panahon karon, ang mga katawhan nagkabangi sa ilang mga baroganan niini. Dili kini bag-ong isyu. Kon unsa man ang tubag: mapositibo o manigatibo, ang isyu kabahin sa kinabuhing dayon maoy usa sa mga labing seryosong giatubang sa tawo. Kining maong isyu naglambigit man gud sa labing taas nga makab-ot sa tawo. Sa kasaysayan sa tanang sibilisasyon, ang mga tawo naglaum nianang “laing kinabuhi”. Si Jesus sa makadaghang higayon mitudlo mahitungod niini. Mipasabot pa gani siya nga kining “kinabuhi nga walay katapusan” nagsugod na karon. Alang sa mga matuohon, ang pangutana kon unsay angay buhaton aron makab-ot kini, maoy usa ka pangutanan nga dili lamang sa mga exsperto kondili pangutana nga alang sa tanan.

26Si Jesus mitubag kaniya, "Unsa may giingon sa Kasulatan? Ug giunsa man nimo kini pagsabut?" 27Ang magtutudlo sa Balaod mitubag, “ ‘Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong kusog, ug sa tibuok mong hunahuna,’ug 'Higugmaa ang imong isigkatawo ingon sa paghigugma mo sa imong kaugalingon.’ ” 28Mitubag si Jesus, "Husto ang imong tubag; buhata kana ug makadawat ka sa kinabuhi.” Ang batid sa Balaod mipakli una sa matag adlaw nga pag-ampo sa mga Judio nga gitawag og “Shema” nga kinuha gikan sa Basahon sa Deuteronomio 6:5. Si Jesus mibungat usab sa maong pag-ampo adlaw-adlaw. Apan ang magtutudlo sa Balaod mipuno og tudling nga gikan sa Leviticus 19:18. Sa ato pa, aron magpuyo hangtud sa kahangturan kinahanglan nga kita mahigugma! 29Apan ang magtutudlo sa Balaod buot ilhon nga husto siya, ug mao nga nangutana siya kang Jesus, "Kinsa ba diay ang akong isigkatawo?" Hangtud niining higayona, ang mga gitudlo ni Jesus wala gayoy kabag-ohan. Mao kini ang gitudlo sa mga Judio kabahin sa Balaod diha sa Daang Testamento. Mao usab kini ang gipanudlo sa tanang relihiyon. Apan ang tubag sa pangutana ni Jesus, “Kinsa ba diay ang akong isigkatawo?” maoy usa ka bag-ong isyu diha sa Ebanghelyo: Nga ang paghigugma usa ka akto nga unibersal. Bisan gani ang atong mga kaaway iapil sa maong paghigugma!

30Si Jesus mitubag, "May usa ka tawo nga milugsong gikan sa Jerusalem ngadto sa Jerico, ug gibanhigan siya sa mga tulisan. Gihuboan nila siya, gibun-og, ug gibiyaan nga himatyon. 31Ug nahitabo nga may usa ka pari nga miagi niadtong dalana; sa pagkakita niya sa tawo, milabay lamang siya agi sa pikas daplin. 32Unya nahiagi usab ang usa ka Levita, ug miduol siya ug mitan-aw sa tawo, ug unya misaylo lamang agi sa pikas daplin. Usa ka pari. Ug usa ka “Levita”! Gipahimutang ni Jesus kining duha ka matang sa alagad sulod sa templo. Sila mao ang mga exsperto sa liturhiya nga misunod sa Balaod nga may kalabutan sa rito sulod sa templo. Ang korte sa pamalaod sa atong panahon karon walay duhaduha mopahamtang gayod og silot kanila tungod sa ilang pagdumili sa pagtabang. Apan sa pamalaod sa mga Judio sila sakto. Kay sumala sa mentalidad sa mga Judio, ang mga tawo nga mangulo sa rito sulod sa templo kinahanglan gayod nga “hinlo”. Busa mao nga sila wala gayod mangahas sa paghikap sa tawo nga nagkadugo kay ang dugo alang kanila “hugaw”. Apan si Jesus misaway niining duha tungod kay alang kang Jesus dili ang balaod sa “pagka-hinlo” mao ang labing mahinungdanon, kondili labaw pa gayod ang pagtuman sa balaod sa “paghigugma” (Mateo 9:13, 12:7, 23:23).

33Apan may usa ka Samaryanhon nga nagpanaw niadtong dalana nahiagi sa gitulisan, ug sa pagkakita niya sa tawo, naluoy siya. 34Miduol siya kaniya, ug gibuboan niyag lana ug bino ang iyang mga samad ug gibugkosan; unya gipasakay niya ang tawo sa iyang hayop ug gihatod ngadto sa usa ka abotanan, ug didto iyang gialimahan siya. 35Sa pagkaugma mihatag siyag duha ka denario ngadto sa tig-atiman sa abotanan ug mitugon, 'Galma siya ug inigbalik ko dinhi bayran ko ikaw sa imong magasto.’ ” Samaryanhon! Giisip nga kaaway sa mga Judio, mga “bulingon”, tinamay, wala mosunod sa tinuod nga relihiyon, usa ka tawo nga likayan. Siya hinoon ang mibati alang sa usa nga nagkinahanglan og tabang! 36Ug si Jesus mitapos pag-ingon, "Karon kinsa man niining tulo sa imong hunahuna ang nagpakita nga isigkatawo sa gitulisan?” 37Ang magtutudlo sa Balaod mitubag, “Kadtong naluoy kaniya.” Si Jesus miingon, “Busa lakaw ug buhata ang sama sa iyang gibuhat.” Si Jesus hingpit nga mibag-o sa kahulogan sa “isigkatawo”. Ang “isigkatawo” mao “ako” kon motabang ako sa uban!