Human niini, gipili sa Ginoo ang laing kapitoag-duha ka lalaki. Gipadala sila sa tinagurha aron mag-una kaniya ngadto sa tagsa-tagsa ka lungsod ug dapit nga iyang adtoan. 2Miingon siya kanila, "Ang anihon daghan, apan diyotay ra ang mga mangangani. Busa pag-ampo kamo sa tag-iya sa anihon aron magpadala siyag dugang pang mamumoo nga moani niini. 3 Lakaw kamo, nagpadala ako kaninyo nga sama sa mga nating karnero ngadto sa mga lobo. 4 Ayaw pagdala og puntil, ni sudlanan sa limos, ni sandalyas; ayaw kamo paghunong aron paghimamat kang bisan kinsa diha sa dalan. 5Bisan diing balaya kamo moabot, unaha ninyo pag-ingon, “Ang panagdait maania niining balaya. 6Kon didto may nagpuyo nga mahigugmaon sa pakigdait, ibilin kaniya ang inyong yukbo sa pakigdait; kon wala, bakwia ang inyong yukbo sa pakigdait." 7"Pabilin kamo niadtong balaya, ug kaon ug inom sa ilang idalit kaninyo; kay ang mamumoo angay gayod nga suholan. Ayaw pagbalhinbalhin gikan sa usa ka balay ngadto sa lain. 8Kon moadto kamo sa usa ka lungsod ug dawaton kamo nila, kaon sa idalit kaninyo; 9ayoha ang mga masakiton niadtong lungsora, ug sultihi ang mga tawo didto nga hapit na moabot kanila ang pag-hari sa Dios." Ang Ebanghelyo sa Ginoo.

oOo

KAHULOGAN SA EBANGHELYO (Lukas 10:1-9)

1Human niini, gipili sa Ginoo ang laing kapitoag-duha ka lalaki. Gipadala sila sa tinagurha aron mag-una kaniya ngadto sa tagsa-tagsa ka lungsod ug dapit nga iyang adtoan. Si San Lukas, kinsa maoy kauban ni San Pablo ang Apostoles sa mga dapit nga gipuy-an sa mga Hentil, mao ray misaysay kabahin niining hitaboa. Dili lamang diay kay ang mga napulog-duha (12) ka mga apostoles mao ang gipadala ni Jesus, kondili mipadala usab si Jesus sa kapitoag duha (72). Kon susihon mas detalyado pa ang paghulagway ni Lukas niining hitaboa kay sa pagpadala sa napulog-duha (12). Kini nagtug-an kanato nga ang Simbahan dili diay kay mga Obispo ug pari lamang, kondili lakip gayod ang matag usa nga binunyagan. Ang mga laygo diay mga pinadala. Aduna usay mga babaye nga gipadala (Lukas 8:1-3).

Tinagurha. Tungod kay sa Balaod gikinahanglan ang duha ka mga tawo aron ang ilang testigo o pagsaksi katuohan (Deuteronomio 19:15). Pananglitan: si Pablo uban ni Bernabe; si Bernabe uban ni Markos; si Pablo uban ni Silas. Kini mao ang nailhan sa atong modernong panahon og teamwork. 2Miingon siya kanila, "Ang anihon daghan, apan diyotay ra ang mga mangangani. Busa pag-ampo kamo sa tag-iya sa anihon aron magpadala siyag dugang pang mamumoo nga moani niini. Tataw kaayo nga dili pa igo ang kapitoag duha (72). Kinahanglan pa ang dugang. Gawas nga kitang tanan pinadala, kita usab kinahanglan nga makanunayong mag-ampo alang sa dugang pang mga pinadala. 3 Lakaw kamo, nagpadala ako kaninyo nga sama sa mga nating karnero ngadto sa mga lobo.

Lakaw! Usa kini ka sugo!

Si Jesus wala magpanuko sa pagtug-an kanato nga ang misyon sa pagkapinadala usa ka malisod nga panggibuhaton. Ang mga pinadala daw mga nating karnero taliwala sa daghang mga lobo. Busa dili gayod kita magpakasayon! 4a Ayaw pagdala og puntil, ni sudlanan sa limos, ni sandalyas; Si Jesus wala maghatag og doktrina nga maoy dad-on sa mga pinadala ngadto sa mga katawhan sa ilang pag-misyon, kondili ang gihatag niya ngadto kanila mao ang unsay angay buhaton o behavior diha sa ilang pagwali sa Gingharian sa Dios. Kinabuhi nga gipuy-an dili doktrina ang gikinahanglan! Ug ang kinabuhi nga angay puy-an mao ang kinabuhi sa pagka-kabos! 4abayaw kamo paghunong aron paghimamat kang bisan kinsa diha sa dalan. Dili kini kasugoan sa dili pagtagad kang bisan kinsa, kondili kasugoan sa dili pag-usik og panahon. Kon mobasa kita sa saysay nga sinulat ni San Lukas ang iyang paglarawan sa mga pinadala mao ang ilang pagdagan (running). Midagan si Maria aron sa pagduaw kang Isabel; midagan ang mga magbalantay sa mga hayop padulong sa pasongan; midagan si Felipe aron pag-agpas sa gisakyan sa usa ka opisyal nga taga Ehipto (Buhat 8:30). Dili ilangaylangay ang pagwali sa Mensahe!

5Bisan diing balaya kamo moabot, unaha ninyo pag-ingon, “Ang panagdait maania niining balaya. 6Kon didto may nagpuyo nga mahigugmaon sa pakigdait, ibilin kaniya ang inyong yukbo sa pakigdait; kon wala, bakwia ang inyong yukbo sa pakigdait." Gimugna ni Jesus ang usa ka estilo sa kinabuhi (Life-style): Pagkamalinawon ug pagkamalipayon. Kalinaw ug kalipay—duha ka timailhan sa makit-an niadtong tinuod nga pinadala! “Ang kalinaw ihatag ko kaninyo, ang kalinaw ibilin ko kaninyo” mao kini ang atong kanunayng giproklamar sulod sa matag kasaulogan sa Santos nga Misa. Mao usab unta kini ang atong kasinatian diha sa atong Kristohanong katilingban. 7"Pabilin kamo niadtong balaya, ug kaon ug inom sa ilang idalit kaninyo; kay ang mamumoo angay gayod nga suholan. Ayaw pagbalhinbalhin gikan sa usa ka balay ngadto sa lain. 8Kon moadto kamo sa usa ka lungsod ug dawaton kamo nila, kaon sa idalit kaninyo;

Ang balaod mahitungod sa pagkaon ug pag-inom sa mga Judio hilabihan sa ka higpit o estrikto. Gitawag kinig “kosher”. Busa ang pagkaon ug pag-inom sa bisan unsay gidalit daw usa ka kagawasan gikan sa lisod sundon nga kosher. Nagpasabot kini ang bukas o gawasnon gayod ang mga pinadala sa unsay ikadalit sa mga moabiabi kanila. Ang mga pinadala nga misyonero bukas sa ilang kaugalingon sa kasinatian o sa kultura nga ila sa mga tawo. Dili nato biyaan o isalikway ang mga nindot nga tradisyon nga maoy naandan sa mga dapit nga atong giduaw. 9ayoha ang mga masakiton niadtong lungsora, ug sultihi ang mga tawo didto nga hapit na moabot kanila ang paghari sa Dios." Konkreto ug praktikal kining maong Ebanghelyo. Usa ka “Maayong Balita” nga adunay aksyon, dunay himoon! Ang paghatag og kaayohan maoy dakong timaan sa pag-abot sa gingharian sa Dios! Ang pagtuo sa Dios mao ang pagpakita og kaayo ug pagdala og kaayohan!