Sa nagkaduol na ang mga adlaw nga si Jesus hapit na mokayab sa langit, mihukom siya pag-adto sa Jerusalem. 52Mipadala siya og mga sinugo nga nag-una kaniya, ug nangadto sila sa usa ka balangay sa Samaria aron pag-andam sa tanan alang kaniya. 53Apan nagdumili ang mga tawo didto sa pagdawat kaniya, kay dayag man nga nagpadulong siya sa Jerusalem. 54Sa pagkasayod niini sa mga tinun-an nga si Santiago ug si Juan, miingon sila, "Ginoo, buot ka ba nga mosugo kami nga mag-ulan og kalayo gikan sa langit aron malaglag sila?"

55Si Jesus milingi ug gibadlong sila. 56Ug mipadayon sila paglakaw ngadto sa laing balangay.

57Samtang naglakaw sila, may usa ka tawo nga miingon kang Jesus, ”Mosunod ako kanimo bisan asa ka moadto." 58Si Jesus miingon kaniya, “Ang mga milo may tagoanan, ug ang mga langgam may mga salag, apan walay kahigdaan ug kapahulayan ang Anak sa Tawo." 59Ug miingon ang tawo, “Sir, mouli una ako aron paglubong sa akong amahan." 60Si Jesus mitubag, “Pasagdi ang mga patay nga maglubong sa ilang mga minatay. Apan ikaw, lakaw ug iwali ang Gingharian sa Dios.” 61May laing tawo usab miingon, “Mosunod ako kanimo, sir, apan tugoti una ako pagpauli aron pagpanamilit sa akong banay." 62Si Jesus miingon kaniya, “Kinsa gani kadtong mosugod pagdaro ug unya magpunayg lingi dili angay sa Gingharian sa Dios." Ang Ebanghelyo sa Ginoo.

oOo

KAHULOGAN SA EBANGHELYO (Lukas 9:51-62)

Kining bahina sa Ebanghelyo sumala sa saysay ni San Lukas mao ang pagsugod sa laing yugto sa pagministro ni Jesus. Kutob niining bahina ang pagmisyon ni Jesus diha lamang sulod sa kayutaan sa Galilea. Sugod dinhi, ug sa sunod nga napulo ka mga ulohan, si Jesus migawas na gikan sa Galilea ug siya nagpadulong ngadto sa Jerusalem. Pagaisipon kini nga usa ka espirituwal nga paglawig ug dili pag-adto sa usa ngadto sa laing mga dapit (Lukas 9:51, 13:22, 17:11). 51aSa nagkaduol na ang mga adlaw nga si Jesus hapit na mokayab sa langit… 51bmihukom siya pag-adto sa Jerusalem. Usa kini ka solemning pasiuna. Tungod kay ang kamatayon ni Jesus nga “nagkaduol na” dili man usa ka wala damhậ nga panghitabo sa kaagi ni Jesus, kondili usa kini ka “kalampusan” o “achievement”. Si Jesus moagi nianang matanga sa kamatayon aron sa hingpit matuman niya ang balaang gimbut-an sa Amahan. Ang kamatayon nga iyang sagupon giisip nga “pagkayab sa langit” tungod kay ang maong kamatayon mao man ang taytayan tali kanato nga iyang mga tinubos balik ngadto sa Gingharian sa Amahan.

51b...mihukom siya pag-adto sa Jerusalem.

Nagpasabot kini nga ang gibuhat ni Jesus maoy usa ka pagpakita og kaisog ug kadasig. Wala siya magduhaduha sa pagpanaw ngadto sa dakbayan diin gahulat kaniya ang kamatayon. 52Mipadala siya og mga sinugo nga nag-una kaniya, ug nangadto sila sa usa ka balangay sa Samaria aron pag-andam sa tanan alang kaniya. 53Apan nagdumili ang mga tawo didto sa pagdawat kaniya, kay dayag man nga nagpadulong siya sa Jerusalem. Adunay hinungdan ngano nga si Jesus wala dawata sa Samaria ug mao kini: “kay dayag man nga nagpadulong siya sa Jerusalem”. Ang mga matuohong mga Judio nagaisip sa mga Samaritano nga mga “sismatiko” o mga nahibulag sa naandang panon. Gituohan sa mga Judio sa Jerusalem nga ang pagtukod sa mga Samaritano og templo didto sa bukid sa Gerizim, sila nakig-indig sa templo sa Jerusalem. Busa ang mga taga-Jerusalem misaway sa mga taga Samaria. Sa laing bahin ang mga Samaritano mibalos pinaagi sa paglisodlisod o paghimog harassment niadtong mga pilgrimahe nga moagi sa Samaria padulong sa Jerusalem.

Si Jesus naipit niining maong situwasyon, apan wala niya likayi ang pakigharong niini. Gani, adunay mga higayon nga dayag nga gidayeg ni Jesus ang mga katawhan sa Samaria: Ang pagkamatinabangon sa usa ka taga-Samaria (Lukas 10:30); ang pagkamapasalamaton sa laing taga-Samaria (Lukas 17:16). Wala mopili og tawo si Jesus diha sa iyang paghigugma! 54Sa pagkasayod niini sa mga tinun-an nga si Santiago ug si Juan, miingon sila, "Ginoo, buot ka ba nga mosugo kami nga mag-ulan og kalayo gikan sa langit aron malaglag sila?" Mao kini ang matang sa silot nga gipahamtang ni Elias ngadto sa iyang mga kaaway (2 Hari 1:10). Ang duha ka mga anak sa dalugdog (Markos 3:17), Santiago ug Juan, nahitunong gayod sa ilang ngalan. Apan wala gayod sila makasabot sa mensahe ug sa buhat ni Jesus. Ang labing subo sa ilang sugyot mao nga ilang giguba ang larawan sa Dios: ilang gituohan nga insakto ang ilang pagtugkad sa kabubut-on sa Dios ug nga ilang nakuptan ang kamatuoran.

Bisan sa atong panahon karon, daghan ang mituo nga mahangyo ang Ginoo sa paglaglag sa atong mga kaaway! Apan si Jesus mitudlo sa pagpasaylo (Lukas 19:10). Ang Ginoo dili mosilot kondili mopasaylo (Lukas 23:24)! 55Si Jesus milingi ug gibadlong sila. 56Ug mipadayon sila paglakaw ngadto sa laing balangay. Mipadayag si Jesus sa tinuod nga hulagway sa Dios: nga bisan sa iyang pagkagamhanan dili gayod mamugos sa iyang mga ginsakopan ug dili modaot sa iyang mga kaaway. Naghulat lamang si Jesus nga moabot ang panahon nga ang kamatuoran madawat ra unya kanila. 57Samtang naglakaw sila, may usa ka tawo nga miingon kang Jesus, ”Mosunod ako kanimo bisan asa ka moadto." 58Si Jesus miingon kaniya, “Ang mga milo may tagoanan, ug ang mga langgam may mga salag, apan walay kahigdaan ug kapahulayan ang Anak sa Tawo." Gitudlo dinhi ni Jesus ang usa ka kamatuoran nga si bisan kinsa nga magmatinud-anon sa pagsunod kaniya makasinati usab og mga pagsalikway. 59Ug miingon ang tawo, “Sir, mouli una ako aron paglubong sa akong amahan." 60Si Jesus mitubag, “Pasagdi ang mga patay nga maglubong sa ilang mga minatay. Apan ikaw, lakaw ug iwali ang Gingharian sa Dios.” Dinhi nato matugkad ang pagkalisod gayod sa pagka-sumusunod ni Jesus. 61May laing tawo usab miingon, “Mosunod ako kanimo, sir, apan tugoti una ako pagpauli aron pagpanamilit sa akong banay." 62Si Jesus miingon kaniya, “Kinsa gani kadtong mosugod pagdaro ug unya magpunayg lingi dili angay sa Gingharian sa Dios." Ang pagpangalagad sa Gingharian sa Dios nagkinahanglan og personal nga sakripisyo.