18 Usa ka higayon niana, samtang nag-ampo si Jesus nga siya rang usa, miduol kaniya ang mga tinun-an. “Kinsa man kuno ako sumala sa sulti sa mga tawo?" nangutana siya kanila. 19"Nag-ingon ang uban nga ikaw mao si Juan Magbubunyag" nanubag sila. “Nag-ingon usab ang uban nga ikaw mao si Elias, samtang ang uban pa gayod nag-ingon nga ikaw usa sa mga propeta kaniadto nga nabanhaw." 20Ug kamo, unsa may inyong ikasulti? Kinsa man ako?" nangutana siya kanila. Mitubag si Pedro, " Ikaw mao ang Mesiyas nga pinadala sa Dios!"

21Apan gipinahan sila ni Jesus nga dili gayod manugilon niini kang bisan kinsa, 22ug midugang siya pag-ingon, "Ang Anak sa Tawo kinahanglan nga mag-antos pag-ayo ug isalikway sa mga punoan sa mga Judio, sa mga kadagkoan sa mga pari, ug sa mga magtutudlo sa Balaod. Patyon siya ug banhawon sa ikatulo ka adlaw."

23Ug miingon siya sa tanan, "Kon may buot mosunod kanako, kinahanglan nga magdumili siya sa iyang kaugalingon, magpas-an sa iyang krus sa tanang adlaw ug magsunod kanako. Kay ang buot maluwas sa iyang kinabuhi kawad-an hinoon niini, apan ang kawad-an sa iyang kinabuhi tungod kanako magluwas niini." Ang Ebanghelyo sa Ginoo.

oOo

Kahulogan sa Ebanghelyo: (Lukas 9:18-24)

18aUsa ka higayon niana, samtang nag-ampo si Jesus nga siya rang usa...

Sugdan ni Jesus sa pag-ampo ang bisan unsang dinagkong panghitabo nga iyang ikahibalag diha sa kinabuhi: iyang bunyag didto sa Jordan (Lukas 3:21); sa iyang unang pakig-hinagbo sa panon sa mga katawhan (Lukas 5:16); sa pagpangandam sa pagpili sa iyang mga Apostoles (Lukas 6:12); sa dihang gipangutana sila niya kabahin sa ilang pagtuo (Lukas 9:18); sa panahon sa pagkabalhin sa iyang panagway o transfiguration (Lukas 9:28); sa pagtudlo kaniya sa pag-ampo ngadto sa Amahan o Our Father (Lukas 11:1); sa panahon sa iyang pagsugot sa kabubut-on sa Amahan didto sa Getsemani (Lukas 22:41); ug sa iyang pagpangandam sa iyang kamatayon didto sa krus (Lukas 23:34, 23:46).

Niining bahina sa Ebanghelyo, si Jesus nakapakita sa iyang gahum pinaagi sa pagpadaghan sa pan o multiplication of the bread (Lukas 9:10-17). Tungod niini ang panon sa mga katawhan buot nga mohimo kaniya nga ilang hari (Juan 6:15). Apan gidumili kini ni Jesus. Ug gumikan niini, daghan sa iyang mga tinun-an ang wala na usab mosunod kaniya. Mao nga si Jesus nangutana sa iyang mga Apostoles kon makapadayon ba sila sa pagsunod kaniya. Tungod sa hilabihang pagka-mahinungdanon niini, si Jesus mihimog pag-ampo una pa siya mangutana kabahin sa ilang pagtuo.

18b… miduol kaniya ang mga tinun-an. “Kinsa man kuno ako sumala sa sulti sa mga tawo?" nangutana siya kanila. 19"Nag-ingon ang uban nga ikaw mao si Juan Magbubunyag" nanubag sila. “Nag-ingon usab ang uban nga ikaw mao si Elias, samtang ang uban pa gayod nag-ingon nga ikaw usa sa mga propeta kaniadto nga nabanhaw."

Tapos sa iyang pag-ampo, si Jesus nangutana kanila. Alang kaniya mahi-nungdanon kaayo ang ilang pagtuo kabahin kaniya. Adunay gisunod nga proseso sa Jesus sa paagi sa iyang pagpangutana. Misugod siya sa pangutana kansang mga tubag dili pa lambigit sa ilang personal nga pagtuo. Ang opinyon sa uban dili pa igo sa pagtugkad sa ilang kaugalingong pagtuo. Kinahanglan gayod nga sila mohimo sa gawasnon ug kinaugalingong pag-angkon sa ilang pagtuo.

20aUg kamo, unsa may inyong ikasulti? Kinsa man ako?" nangutana siya kanila.

Ang pagka-Kristyano nagkinahanglan og pagtahan sa personal nga tubag nii-ning maong pangutana sa pagtuo. Dili kini sayon. Ang tubag dili mao ang paglitok sa pormula sa pagtuo o recitation of the Creed pinaagi sa atong mga ngabil lamang. Ang matuod nga pagtuo ipakita gayod sa matag adlaw nga pagpakabuhi!

20bMitubag si Pedro...

Bisan pa sa daghang mga kontrobersiya mahitungod sa papel sa Santo Papa sulod sa daghang mga panahon, ang pagtubag ni Pedro sa pangutana ni Jesus makahatag kanato og katin-awan sa kamahinungdanon sa papel ni San Pedro nga atong mabasa diha sa Ebanghelyo. Ang gibuhat ni Pedro maoy sukaranan sa mga gibuhat sa Santo Papa: nga mao ang pagtubag sa pangutana sa Pagtuo sa ngalan sa tibuok Katolikong Simbahan. Sama kang Pedro, ang Santo Papa maoy atong tigpamábá sa Pagtuo.

20c"Ikaw mao ang Mesiyas nga pinadala sa Dios!"

May dakong kalainan ang tubag ni Cristo kon itandi sa unsay panahom sa mga katawhan bahin kang Jesus.

Sa pagpahayag ni Pedro nga si Jesus mao ang Mesiyas, sumala sa bersyon sa Ebanghelyo sumala kang Lukas, adunay dakong hinungdan. Sa Griego ang Mesiyas mao ang pulong “Christos” nga nagkahulogan sa pagka-dinihogan sa Dios. Ang pulong “Messiah” mao ang pulong nga Hebreo sa “Christos”. Ang saktong pagkaila ni Pedro kang Jesus wala makuha sa tawhanong kaalam o obserbasyon lamang, kondili usa ka kamatuoran nga gitug-an pinaagi sa kahayag sa Espiritu Santo!

21Apan gipinahan sila ni Jesus nga dili gayod manugilon niini kang bisan kinsa, 22ug midugang siya pag-ingon, "Ang Anak sa Tawo kinahanglan nga mag-antos pag-ayo ug isalikway sa mga punoan sa mga Judio, sa mga kadagkoan sa mga pari, ug sa mga magtutudlo sa Balaod. Patyon siya ug banhawon sa ikatulo ka adlaw."

Ang Pasko sa Kamatayon ug Pagkabanhaw ni Jesus mao lamang gayod ang makapatataw kon kinsa gayod si Jesus. Mao nga hangtod nga kini mahitabo kinahanglan nga sila mohilom.

23Ug miingon siya sa tanan, "Kon may buot mosunod kanako, kinahanglan nga magdumili siya sa iyang kaugalingon, magpas-an sa iyang krus sa tanang adlaw ug magsunod kanako. Kay ang buot maluwas sa iyang kinabuhi kawad-an hinoon niini, apan ang kawad-an sa iyang kinabuhi tungod kanako magluwas niini."

Ang gisulti ni Jesus alang sa “tanan”. Ang kamatuoran kabahin sa krus alang man gud sa tanan. Tungod kay ang krus dili man masabot kon dili sination ang pagdumili sa kaugalingon, mao nga mitapos kining maong Ebanghelyo kabahin sa kamatuoran bahin sa paagi sa pag-angkon sa kaluwasan: Ang kawad-an sa kinabuhi mao ang makakaplag niini!