36Unya may usa ka Pariseo nga midapit kang Jesus sa pagpangaon. Busa miadto si Jesus sa balay sa Pariseo ug nakigsalo kaniya. 37Niadtong lungsora may usa ka babaye nga daotag kinabuhi. Sa iyang pagkadungog nga si Jesus nagkaon didto sa balay sa Pariseo, miadto siya dala ang usa ka tibod nga alabastro nga puno sa pahumot. 38Samtang diha siya sa luyo ni Jesus dapit sa tiilan, mihilak siya ug nahumod sa iyang mga luha ang mga tiil ni Jesus. Unya gipahiran niya sa iyang buhok ang mga tiil ni Jesus, ug gihagkan ug gibuboan sa pahumot. 39Sa pagkakita niini sa Pariseo nga nagdapit kang Jesus, miingon siya sa iyang kaugalingon, "Kon kining tawhana tinuod pa nga propeta, makaila unta siya kon kinsa kining babaye nga mihikap kaniya, ug unsa kadautan ang iyang kinabuhi!"40Apan miingon si Jesus kaniya, "Simon, aduna akoy isulti kanimo."Si Simon mitubag, "Sige, Magtutudlo, sultihi ako." 41"May duha ka tawo nga nakautang sa usa ka tigpahulam og kuwarta," miingon si Jesus. "Ang usa nakautang og kinyentos ka denario ug ang usa singkuwenta. 42Apan kay silang duha dili man makabayad, gipapas na lamang ang ilang utang. Karon, kinsa man sa duha ang labaw nga mahigugma sa nagpahulam kanila?" 43"Sa akong hunahuna," mitubag si Simon, "kadtong dakog utang." "Husto ang imong tubag," matod ni Jesus, 44Unya milingi siya sa babaye ug miingon kang Simon, "Nakita mo ba kining babaye? Mianhi ako sa inyo, ug wala mo ako hatagig tubig aron ihugas sa akong mga tiil, apan gihugasan niya ang akong mga tiil sa iyang mga luha ug gipahiran sa iyang buhok. 45Wala mo ako hagki sa imong pagdawat kanako, apan nagpunay siyag halok sa akong mga tiil sukad sa akong pag-abot. 46Wala mo hisuig lana ang akong ulo, apan iyang giagwahan ang akong mga tiil. 47Busa sultihan ko ikaw nga ang dakong gugma nga iyahang gipakita nagmatuod nga gipasaylo na ang daghan niyang mga sala. Kinsa kadtong gipasaylo sa diyotayng mga sala nagpakita og dyutay lamang nga paghigugma.” 48Unya giingnan ni Jesus ang babaye, "Gipasaylo na ang imong mga sala." 49Ug ang uban nga didto sa kan-anan miingon sa ilang kaugalingon, "Kinsa ba kining tawhana nga nagpasaylog mga sala?" 50Apan miingon si Jesus sa babaye, "Ang imong pagtuo nagluwas kanimo; pauli nga malinawon." Ang Ebanghelyo sa Ginoo.

oOo

Kahulogan sa Ebanghelyo: (Lukas 7:36-50)

36Unya may usa ka Pariseo nga midapit kang Jesus sa pagpangaon. Busa miadto si Jesus sa balay sa Pariseo ug nakigsalo kaniya. Si San Pablo sa makutlo ka mga higayon misulat nga ang mga Pariseo midapit kang Jesus sa pagpangaon (Lk 7:36; 11:37; 14:1). Sumala ni Mateo ug Markos, milarawan sa mga Pariseo nga mga kaaway kang Jesus. Si Lukas mas duol sa kamatuoran: Nga si Jesus wala gayod magasalikway kang bisan kinsa. Hinoon aduna gayoy kaaway si Jesus, apan dili kay nagdumot Siya kanila, kondili tungod kay lahi ang ilang mga baroganan sa pipila ka isyu—labi na ang baroganan kabahin sa maksasala ug sala. Sa tinuoray, ang gipamulong ug gibuhat ni Jesus, makapakurat sa uban. Dili siya mao ang gituohan sa kasagarang mga tawo. Si Jesus dayag nga nakigsalo uban sa mga maksasala sa mga panahon sa salosalo o pagpangaon. Ang Dios dili kill-joy. Nakig-uban-uban siya kanatong mga tawo. Si Jesus nakig-uban sa mga tawo sa pagpangaon sa walay pagpinig.

37Niadtong lungsora may usa ka babaye nga daotag kinabuhi. Sa iyang pagkadungog nga si Jesus nagkaon didto sa balay sa Pariseo, miadto siya dala ang usa ka tibod nga alabastro nga puno sa pahumot. 38Samtang diha siya sa luyo ni Jesus dapit sa tiilan, mihilak siya ug nahumod sa iyang mga luha ang mga tiil ni Jesus. Unya gipahiran niya sa iyang buhok ang mga tiil ni Jesus, ug gihagkan ug gibuboan sa pahumot. Alang sa mga Judio, bisan kinsa ang makasulod kon adunay salosalo sulod sa balay. Bisan kinsa usab ang makadala og pahumot isip pagpadayg og pag-abi-abi. Kining babaye nga nagdalag pahumot nga gipahimutang ngadto sa mga tiil ni Jesus, nailhan sa tanan nga usa ka makasasala. Tingali, nagbaligya sa iyang kaugalingon. Nagbasol siya sa iyang nabuhat, sa atubangan sa tanan, iyang gipakita ang maong pagbasol. Kini giapil niining maong saysay, kay si Jesus adunay pagtulun-an nga ikatudlo gikan niini.

39Sa pagkakita niini sa Pariseo nga nagdapit kang Jesus, miingon siya sa iyang kaugalingon, "Kon kining tawhana tinuod pa nga propeta, makaila unta siya kon kinsa kining babaye nga mihikap kaniya, ug unsa kadautan ang iyang kinabuhi!" Sumala sa Balaod, ginadili ang paghikap ug pagpahikap sa mga tawo o mananap nga “dili hinlo”. Ug nianang higayona, si Jesus gihusgahan sa mga Pariseo nga dili Siya gikan sa Dios—dili propeta sa Dios— tungod sa maong panghitabo. 40Apan miingon si Jesus kaniya, "Simon, aduna akoy isulti kanimo."Si Simon mitubag, "Sige, Magtutudlo, sultihi ako." 41"May duha ka tawo nga nakautang sa usa ka tigpahulam og kuwarta," miingon si Jesus. "Ang usa nakautang og kinyentos ka denario ug ang usa singkuwenta. 42Apan kay silang duha dili man makabayad, gipapas na lamang ang ilang utang. Karon, kinsa man sa duha ang labaw nga mahigugma sa nagpahulam kanila?" 43"Sa akong hunahuna," mitubag si Simon, "kadtong dakog utang." "Husto ang imong tubag," matod ni Jesus,

Ang tawo nga utangan dili gayod sama niana. Apan si Jesus lahi—usa gayod ka tinuod nga propeta—Iyang gipakita ang tiunay nga gugma sa Amahan. 44Unya milingi siya sa babaye ug miingon kang Simon, "Nakita mo ba kining babaye? Mianhi ako sa inyo, ug wala mo ako hatagig tubig aron ihugas sa akong mga tiil, apan gihugasan niya ang akong mga tiil sa iyang mga luha ug gipahiran sa iyang buhok. 45Wala mo ako hagki sa imong pagdawat kanako, apan nagpunay siyag halok sa akong mga tiil sukad sa akong pag-abot. 46Wala mo hisuig lana ang akong ulo, apan iyang giagwahan ang akong mga tiil. Si Jesus nakigsulti ngadto sa babaye uban sa dakong pagtahod. Iyang gipanalipdan ang iyang tinuod nga dignidad. Iyang gipadayag ang iyang pagka Manunubos. 47Busa sultihan ko ikaw nga ang dakong gugma nga iyahang gipakita nagmatuod nga gipasaylo na ang daghan niyang mga sala. Kinsa kadtong gipasaylo sa diyotayng mga sala nagpakita og dyutay lamang nga paghigugma.”

Ang sambingay adunay ikatug-an kanatong kamatuoran: Ang gugma mosangko gayod sa pagpasaylo. Kini mao ang saysay nga gitawag og “perlas sa pasaylo”. Pagka-tinuod gayod! Nga mianhi siya dili alang sa mga matarong kon dili sa mga makasasala. 48Unya giingnan ni Jesus ang babaye, "Gipasaylo na ang imong mga sala." 49Ug ang uban nga didto sa kan-anan miingon sa ilang kaugalingon, "Kinsa ba kining tawhana nga nagpasaylog mga sala?" 50Apan miingon si Jesus sa babaye, "Ang imong pagtuo nagluwas kanimo; pauli nga malinawon." Si Jesus mipakita sa iyang tinuoray nga pagka-Siya uban sa gahum sa Dios—ang gahum sa pagpasaylo. Bisan gani ang Iyang mga tinun-an natingala. Ug kini maoy nakaagak kanila sa pag-ila kang Jesus nga mao ang “Cristo nga Ginoo!”

— Gihan-ay ni : Padre Jose “ joesum” Sumampong, Jr.