11Sa pagkasayod sa mga tawo niini, minunot sila kaniya. Giabi-abi sila ni Jesus ug gisultihan mahitungod sa Gingharian sa Dios, ug giayo niya ang mga masakiton. 12Sa nagkasalop na ang adlaw, nanuol kang Jesus ang napulog-duha ka tinun-an ug miingon, “Paadtoa ang mga tawo sa kasikbit nga mga balangay ug kaumahan aron mangitag pagkaon ug abotanan kay hilit kining dapita." 13Apan miingon si Jesus kanila, “Kamo ang maghatag kanilag pagkaon." Sila nanubag, "Lima ra ka pan ug duha ka isda ang ania kanamo. Buot ka ba nga manlakaw kami ug mamalit og pagkaon alang niining mga tawhana?" 14(Didto may mga lima ka libo ka tawo.) Unya miingon si Jesus sa iyang mga tinun-an, “Palingkora ang mga tawo ug papundoka sa tinag-kalim-an." 15Gituman kini sa mga tinun-an ug gipalingkod silang tanan. 16Mikuha si Jesus sa lima ka pan ug sa duha ka isda ug miyahat siya sa langit ug nagpasalamat sa Dios. Unya gipikaspikas niya ang pan ug gihatag niya kini sa mga tinun-an aron ilang idulot sa mga tawo. 17Nangaon ug nangabusog silang tanan; ug human niini nakahipos ang mga tinun-an og napulog-duha ka bukag nga salin sa mga tawo. Ang Ebanghelyo sa Ginoo.

oOo

KAHULOGAN SA EBANGHELYO (Lk 9:11-17)

1Sa pagkasayod sa mga tawo niini, minunot sila kaniya. Giabi-abi sila ni Jesus ug gisultihan mahitungod sa Gingharian sa Dios, ug giayo niya ang mga masakiton. Sa sinugdanan sa Ebanghelyo niining Domingoha, si Jesus buot na nga atong tugkaron ang kahulogan sa Misa nga atong gisaulog, labi na sa mga adlawng Domingo. Diha sa Santos nga Misa, ang pan ug bino nga ihalad ni Cristo ngadto sa Amahan giunhan sa liturhiya sa Pulong nga mao ang higayon nga si Jesus mosulti kanato mahitungod sa Gingharian sa Dios. Uban sa maong mga Pulong, kita iyang hatagan og kaayohan gikan sa nagkalainlaing mga kasakitan. Samtang ang pan ug bino makapabusog kanato, si Jesus mitudlo usab nga dili lamang sa pan nga kita mabuhi. Mabuhi usab kita pinaagi sa Pulong! Mao nga mahinungdanon gayod nga dili kita maulahi sa pagsimba aron hingpit nga makaapil kita sa Liturhiya sa Pulong. Paminawon ug pamalandongan nato ang mga pagbasa gikan sa Balaang Kasulatan kay kini mao ang pagpadayag sa Dios nganha sa matag usa kanato kon unsa ang Gingharian sa Dios. Ang maong mga Pulong “sa kahayag nagdala ug nagbanwag sa atong dalan; mga Pulong sa kinaadman ug kinabuhi...”.

12Sa nagkasalop na ang adlaw, nanuol kang Jesus ang napulog-duha ka tinun-an ug miingon, “Paadtoa ang mga tawo sa kasikbit nga mga balangay ug kaumahan aron mangitag pagkaon ug abotanan kay hilit kining dapita." 15Gituman kini sa mga tinun-an ug gipalingkod silang tanan. Kon mohunong kita diha sa materyal nga pagkaon dili gayod kita makatugkad sa espirituhanong kahulogan niini. Kadtong mga batid sa bibliya makakita dayon nga ang aksyon sa paghatag og pan ngadto sa tawo didto sa deserto maoy usa ka pagpahinumdum sa milagro sa mga katingalahang manna sa Basahon sa Exodus. Si Jesus mao ang bag-ong Moises, ang bag-ong manluluwas, ang tawo nga miluwas sa mga katawhan gikan sa yuta sa kamatayon—ang kamingawan! Ang mga tawo dili maluwas sa ilang kagutom pinaagi sa ilang pag-adto sa mga balangay, kondili ang ilang kaluwasan anaa sa ilang pagpabilin uban kang Jesus! Ang kagutom nga espirituhanon dili maalim pinaagi sa tubag nga tawhanon — sama sa solusyon nga gisugyot sa mga apostoles.

13Apan miingon si Jesus kanila, “Kamo ang maghatag kanilag pagkaon." Sila nanubag, "Lima ra ka pan ug duha ka isda ang ania kanamo. Buot ka ba nga manlakaw kami ug mamalit og pagkaon alang niining mga tawhana?" 14(Didto may mga lima ka libo ka tawo.) Unya miingon si Jesus sa iyang mga tinun-an, “Palingkora ang mga tawo ug papundoka sa tinag-kalim-an." Aninawon ta ang mga papel nga ilang gidala o mga tahas nga ilang gihimo: Si Jesus mao ang mohatag sa pan; ang mga apostoles mao ang moapod-apod sa pan ngadto sa mga tawo. Gitugyan usab ngadto sa mga apostoles ang tahas sa pagpahiluna sa bagang panon sa mga katawhan ngadto sa gagmayng mga pundok o gagmayng katilingban. Nahimo silang mga “ministro” ni Jesus. Ang mga apostoles mitahod kang Jesus diha sa ilang pagsunod sa tanang mga sugo. 16Mikuha si Jesus sa lima ka pan ug sa duha ka isda ug miyahat siya sa langit ug nagpasalamat sa Dios. Unya gipikaspikas niya ang pan ug gihatag niya kini sa mga tinun-an aron ilang idulot sa mga tawo.

Tataw kaayo nga si Jesus mihimo sa mga aksyon: pagkuha, pagpanalangin, pagpikaspikas, ug paghatag. Kining mga pulonga maoy makapasabot nato sa rituwal sa Eyukaristiya. Atong mabasa ang susamang mga taho sa tulo ka mga sinulat ni Lukas: 1. Didto sa kamingawan (Lukas 9:15); 2. Didto sa itaas nga lawak o upper room (Lukas 22:19); 3. Didto sa Emmaus (Lukas 24:30). Kining maong mga pulong nga litokon sa pari panahon sa Konsagrasyon sa hostiya sulod sa Santos nga Misa maoy nakapatungha ni Cristo uban kanato sulod sa kasaulogan sa Santos nga Misa. Ang Eyukaristiya makapasinati kanato sa atong Pagtuo sa nabanhawng Jesus, nga nakigbisog batok sa dautan ug sa kamatayon, nga sa ato pa Mangluluwas sa katawhan. Kining pan mao gayod ang Lawas ni Cristo. Kon wala pa kita makaila kang Jesus nga mao “ang pan sa kinabuhi”, kita gidasig dili lamang sa pagtuon sa doktrina mahitungod niini kondili sa paghimog pagsimba o adorasyon sa Santisimo Sakramento aron ang mata sa atong Pagtuo mabukas sa pagsabot niini. 17Nangaon ug nangabusog silang tanan; ug human niini nakahipos ang mga tinun-an og napulog-duha ka bukag nga salin sa mga tawo. Nasayod kita nga ang mga katawhan niadtong panahona wala makasabot niini. Ang kabusog nga ilang nasinati ilang giisip nga yutan-on lamang. Ang Eyukaristiya labaw pa kay niana. Usa ka espirituhanon nga pagkaon. Ug kini giapod-apod panahon sa Santos Nga Misa.