Si Jesus miingon sa iyang mga tinun-an, 12“Daghan pa unta kaayo akog isulti kaninyo, apan karon dili pa kamo makatugkad niini. 13Apan inig-abot sa Espiritu sa kamatuoran, tultolan kamo niya sa tibuok kamatuoran. Dili siya magsulti sa iyang kaugalingong pagbuot, kondili sultihan kamo niya sa iyang nadungog ingon man sa mga butang umaabot. 14Himayaon ako niya, kay ang ania kanako maoy iyang isulti kaninyo. 15Ang tanan nga iya sa Amahan akoa; busa giingon ko nga dawaton sa Espiritu ang ihatag ko kaniya ug isugilon niya kini kaninyo." Ang Ebanghelyo sa Ginoo.

oOo

KAHULOGAN SA EBANGHELYO (Juan 16:12-15)

12“Daghan pa unta kaayo akog isulti kaninyo, apan karon dili pa kamo makatugkad niini.

Mao kini ang kasagaran natong kasinatian. Bisan pa uban sa atong mga minahal sa kinabuhi, adunay kalisod sa pagsulti ngadto kanila sa tanan nga buot unta nato nga mahibaloan kanila. Sa gabii una pa siya mamatay, si Jesus wala makasulti sa tanan ngadto sa iyang mga tinun-an. Ang kamatuoran man gud, labi na niadtong nahilambigit sa Pagtuo, kinahanglan nga ipaagi sa hinayhinay nga pagkabutyag. Bisan pa kon gikapadayag na ang usa ka kamatuoran nagpabilin nga lisod ang hingpit nga pagsabot niini. Sama sa mga Apostoles nga nakig-uban sa linawas ni Jesus sulod sa tulo ka tuig, apan daghan sa mga panghitabo sa kinabuhi ni Jesus nga wala nila dayon matugkad.

Oo, ang Pagtuo naglambigit sa usa ka naglihok nga proseso o dynamic process. Sama kini sa pag-ugmad sa kinabuhi adunay maagiang proseso. Sa pag-aginod sa panahon, ang tawo adunay dugang ug bag-ong makaplagang kamatuoran bahin sa Dios. Sama usab sa nagkaanam og pagdugang sa kahibalo nga moabot sa mga managtiayon nga nagkahigugmaay.

13aApan inig-abot sa Espiritu sa kamatuoran, tultolan kamo niya sa tibuok kamatuoran.

Sa atong lalawigan adunay mga tourist guides kansang buluhaton mao ang paggiya sa mga dumuduong nga mga turista. Kini sila nahibalo gayod sa mga inilang tourist spots dinhi sa ato. Ang mga tourist guides nahibalo sa mga dalan nga agian, nasayod kon unsay makit-an sa usa ka tourist spot, mag-una siya sa paglakaw, apan sayod kita nga ang mga tourist guides dili makapuli sa buluhaton sa mga turista. Kinahanglan nga ang mga turista molihok aron sa pagkuyog sa giya.

Matultolan lamang ang kamatuoran nga ipamatuod sa Espiritu kon adunay paningkamot kanatong mga tumutuo. Aron makat-onan nato ang kamatuoran kinahanglan nga sudlan ang pakigrelasyon tali sa matag usa kanato ug sa Espiritu Santo.

Adunay personal nga paghilambigit! Busa wala diay unta’y ilhon nga “non-practicing believer” o Kristyano apan wala magpraktis sa mga buluhaton sa usa ka Kristyano. Anaa ba diay gugma nga dili ipakita sa buhat? Aduna ba diay pakigrelasyon ngadto sa usa ka tawo nga dili puy-an?

13bDili siya magsulti sa iyang kaugali-ngong pagbuot, kondili sultihan kamo niya sa iyang nadungog ingon man sa mga butang umaabot.

Ang larawan sa usa ka “lanog” o echo maoy makapasabot niini. Tali sa Amahan, Anak, ug Espiritu Santo anaay hingpit nga kahiusahan. Sama sa usa ka lanog nga madungog sa nagkalainlaing higayon ug sa nagkalainlaing matang, apan mao ra gayong lanoga.

Walay laing ikapalanog ang Espiritu Santo gawas sa unsay gikasulti na ni Jesus. Kon ugaling adunay atong madungog nga kunuhay gipadayag sa Espiritu Santo, apan sukwahi sa unsay gikasulti na ni Jesus, kana usa ka dakong bakak. Walay kalainan ang panahom sa Espiritu Santo ug sa kamatuoran nga gipadayag ni Jesus.

14Himayaon ako niya, kay ang ania kanako maoy iyang isulti kaninyo.

Nasayran na nato nga si Jesus mao ang hingpit nga Anak nga hingpit usab sa iyang kalabutan sa Amahan.

Ang hingpit nga kalabutan sa matag Persona sa Santisima Trinidad usa ka misteryo. Walay bisan usa ka butang nga gitipigan sa usag-usa, nga wala mahibaloi sa matag usa. Ang tanan ilang gipanag-ambitan. Walay tawhanong pulong nga sarang makapasabot niini. Misteryo, dili matugkad!

15Ang tanan nga iya sa Amahan akoa; busa giingon ko nga dawaton sa Espiritu ang ihatag ko kaniya ug isugilon niya kini kaninyo."

Pagkakatingalahan! Ang usa ka kabos nga anak sa panday sa Nazaret, sa gabii una pa siya patyon sa mga kadagkoan sa sibil ug rehiliyosong awtoridad sa iyang nasud , namahayag nga ang tanan nga iya sa Dios iyaha!

Dili kini ang unang higayon nga kini iyang gipahayag.