Sa pagkagabii na niadtong Domingoha, nagtigom ang mga tinun-an sulod sa lawak ug gitrangkahan nila ang pultahan kay nahadlok man sila sa mga kadagkoan sa mga Judio. Unya mitungha si Jesus sa taliwala nila ug miingon, “Mainyo unta ang kalinaw." 20Human siya makasulti niini, iyang gipakita kanila ang iyang mga kamot ug ang iyang kilid. Nalipay pag-ayo ang mga tinun-an sa ilang pagkakita sa Ginoo. 21Unya si Jesus miingon kanila pag-usab, "Mainyo unta ang kalinaw. Ingon nga gipadala ako sa Amahan, ako usab nagpadala kaninyo." 22Gisulti niya kini ug unya gihuypan niya sila ug giingnan, "Dawata ninyo ang Espiritu Santo. 23Kon pasayloon ninyo ang mga sala sa mga tawo, gipasaylo kini; kon ang ilang mga sala dili ninyo pasayloon, dili usab kini pasayloon." Ang Ebanghelyo sa Ginoo.

oOo

KAHULOGAN SA EBANGHELYO (Juan 20:19-23)

19aSa pagkagabii na niadtong Domingoha…

Sumala sa Ebanghelyo ni San Juan, sa gabii sa Domingo sa Pagkabanhaw, ang Espiritu Santo gihatag ngadto sa mga Apostoles. Ang Simbahan natawo diha sa huyop ni Jesus! Gikan niadtong adlawa usa ka bag-ong kalibutan nahimugso, usa ka bag-ong binuhat nahitabo. Usa kini ka bag-ong Genesis: ang Ginoo mikupot sa tawo diha sa iyang mga kamot ug Iyang giumol ang tawo sa bag-ong yuta. Gikan niadtong adlawa, ang mga matuohon wala na muhonong sa panagtigum sa unang adlaw sa semana o Domingo. Hangtod sa atong panahon karon ang Simbahan nagpadayon sa pagkatawo pag-usab pinaagi niining maong panagtigum. Daghan ang mga Domingo nga gikinahanglan aron mapadayon ang pagpaugmad sa mga Kristohanon. Ang pagsimba sa Domingo dili lamang tungod kay kini gisugo kondili usa kini ka mahinungdanong kabahin sa kinabuhi sa mga matuohon! Kanunayng gikinahanglan ang pagbag-o sa paghuyop ni Cristo sa gasa sa kinabuhi sa matag usa kanato.

19bnagtigom ang mga tinun-an sulod sa lawak ug gitrangkahan nila ang pultahan kay nahadlok man sila sa mga kadagkoan sa mga Judio. Kahadlok! Ang atong kalibutan sa kanunay nagaungaw sa tumang kahadlok! Ang atong kinabuhi gilibotan sa daghang mga kahadlok. Maayo gayod nga susihon kanato ang atong kaugalingon kon unsa may mga nakapahadlok kanato. 19cUnya mitungha si Jesus sa taliwala nila…

Tinuyoan ni Juan ang pagdugtong sa Pagkabanhaw ni Jesus ug ang paghatag sa gasa sa Espiritu Santo. Diha sa propesyon sa atong Pagtuo o Credo, mituo kita sa Espiritu Santo “ang maghahatag sa kinabuhi”. Kining gasa sa kinabuhi una nga gidawat ni Jesus. Ang pagbuntog ni Jesus sa kamatayon pinaagi sa Pagkabanhaw maoy usa ka lihok sa Espiritu sa Dios! Ug tungod niini wala nay makababag kang Jesus sa pagbarog taliwala sa iyang mga tinun-an. 19dug miingon, “Mainyo unta ang kalinaw."… 20bNalipay pag-ayo ang mga tinun-an sa ilang pagkakita sa Ginoo. Gikan sa kahadlok mibanos ang kalipay pinaagi sa kalinaw. 20aHuman siya makasulti niini, iyang gipakita kanila ang iyang mga kamot ug ang iyang kilid. Nangita ka ba sa imong kabanhawan? Naglisod ka ba sa pagkakaplag sa presensya sa Espiritu Santo?

Sulayi karon sa pagpangita kon hain ang imong mga samad, mga uwat—sulod sa imong kasingkasing, sa imong kinabuhi, sa katilingban, ug sa Simbahan. 21b “…Ingon nga gipadala ako sa Amahan, ako usab nagpadala kaninyo." Alang kang Jesus ang labing mahi-nungdanong bahin sa iyang pagpadala sa iyang mga tinun-an ngadto sa misyon mao ang “sinugdan” sa maong misyon: nga mao ang kahiusahan tali kaniya ug sa iyang Amahan. Ang maong kahiusahan mao usab ang basihanan sa misyon sa Simbahan: ang kahiusahan tali kang Jesus ug sa Simbahan. 22aGisulti niya kini ug unya gihuypan niya sila ug giingnan…

Si Juan migamit niining maong mga panultihon nga nagpahimundum sa laing duha ka mga inilang teksto sa Bibliya: Una, kalabot sa unang binuhat: “… gihuypan niya ang buho sa ilong sa tawo sa makapabuhing ginhawa ug ang tawo nakabaton og kinabuhi” (Genesis 2:7). Ika-duha, kalabot sa katapusang binuhat: “Tawo, sultihi ang hangin nga ako, ang Ginoong Dios, nagsugo kaniya pag-huros ug paghatag og gininhawa niining patayng mga lawas aron mabuhi sila pag-usab” (Ezequiel 37:9). Kon adunay bag-ong binuhat sa pagsugod sa panahon, aduna usay bag-ong binuhat sa katapusan sa panahon, ang kabanhawan sa katapusang adlaw. “Ang gininhawa nga naghatag og kinabuhi” maoy larawan sa Presensya ug Aksyon sa Dios dinhi sa kalibutan. Ang tanan nga adunay kinabuhi nii-ning kalibutana maoy timaan sa maong Balaang Presenya ug Aksyon!

22b"Dawata…

Mahimo nga himoon kining mga pulonga nga maoy sinugdanan sa litok sa atong mga pag-ampo. Ang dakong sayop sa atong panahon karon mao ang pagdumili sa pagdawat. Nagtuo ang modernong tawo nga mabuhi siya nga walay pagdawat gikan sa uban. May kadugtungan ang tanan!

22c … ang Espiritu Santo.

Ang Simbahan usa ka katilingban kay sumpay man kini sa Balaang Katilingban sa Dios: Amahan, Anak, ug Espiritu Santo! 23Kon pasayloon ninyo ang mga sala sa mga tawo, gipasaylo kini; kon ang ilang mga sala dili ninyo pasayloon, dili usab kini pasayloon." Kini mao ang tahas sa Simbahan: pagproklamar sa kapasayloan sa sala.