Unya gipasabot niya sila sa Kasulatan, 46ug miingon siya kanila, "Kini mao ang nahisulat: nga ang Mesiyas kinahanglan mag-antos ug unya mabanhaw sa ikatulong adlaw, 47ug nga sa iyang ngalan ang mensahe mahitungod sa paghinulsol ug sa pagpasaylo sa mga sala kinahanglan isangyaw ngadto sa tanang mga nasod, sugod sa Jerusalem. 48Kamo mga saksi niining mga butanga. 49Ug ako mismo mao ang magpadala nganhi kaninyo sa gisaad sa akong Amahan. Apan kinahanglan maghulat kamo sa siyudad hangtod nga mokunsad kaninyo ang gahom gikan sa kahitas-an."

50Unya gidala niya sila ngadto sa gawas sa siyudad hangtod sa Betania, diin giisa niya ang iyang mga kamot ug gipanalanginan sila. 51Ug samtang siya nanalangin kanila, mibiya siya ug gibayaw ngadto sa langit. 52Gisimba nila siya ug unya mibalik sila sa Jerusalem nga malipayon kaayo. 53Nagkanunayan sila didto sa Templo ug nagpasalamat sa Dios. Ang Ebanghelyo sa Ginoo.

oOo

KAHULOGAN SA EBANGHELYO (Lukas 24:46-53)

Una sa tanan angay natong masayran nga adunay duha ka bersyon sumala ni San Lukas ang saysay mahitungod sa Pagsaka sa Langit ni Jesus. Ang una, mao ang atong mabasa diha sa Ebanghelyo (Lk 24:46-50) diin gitaho nga ang Asensyon nahitabo sa gabii sa adlaw sa Pagkabanhaw. Samtang sa diha Buhat sa mga Apostoles (Buhat 1:3), ang Asensyon nahitabo human sa ika-kap-atan (40) ka adlaw human sa Pagkabanhaw. Adunay tuyo si Lukas sa iyang nilain nga paghulagway niini. Ang Asensyon “sa gabii sa Pagkabanhaw” mao ang pagtak-op sa tawhanong kinabuhi ni Jesus pinaagi sa pagpaisa sa iyang balaanong pagka-Ginoo o divine Lordship. Giisip kini nga mao ang katapusang pahina sa Ebanghelyo. Giila usab kini nga katapusang yugto sa panahon ni Jesus nga Nazaretnon.

Samtang ang Asensyon “sa ika-kap-atan ka adlaw human sa Pagkabanhaw” mao ang timaan sa pagsugod sa bag-ong kinabuhi ni Jesus nga dili na moila sa luna ug sa panahon (space and time). Giisip kini nga mao ang unang pahina sa Buhat sa mga Apostoles. Giila usab kini nga sinugdanan sa panahon sa Simbahan. Sa ato pa, ang katapusang yugto sa panahon ni Jesus nga Nazaretnon mao ang sinugdanan sa panahon sa Simbahan. 45 Unya gipasabot niya sila sa Kasulatan, 46ug miingon siya kanila, "Kini mao ang nahisulat: nga ang Mesiyas kinahanglan mag-antos ug unya mabanhaw sa ikatulong adlaw, Nasabtan lamang sa mga Apostoles kon unsay kahulogan sa mga “nahisulat” sa dihang nahitabo na ang Pagkabanhaw. Sa samang paagi nga ang hingpit nga pagsabot sa atong matag usa nga kinabuhi anha lamang mahitabo kon makita na nato ang kahingpitan sa kahayag, ang Adlaw sa Ginoo!

Ang mga panghitabo sulod sa kinabuhi ni Jesus puno sa tanghaga, makalibog ug lisod tugkaron. Bisan gani ang mga kasakitan ug kamatayon ni Jesus sa krus nagpabilin nga dili masabtan. Ug sa panahon sa Pagkabanhaw, ang mga tinun-an nakakaplag nga ang tanang mga panghitabo sa kinabuhi ni Jesus mao diay ang katumanan sa misteryosong plano sa Amahan. Adunay dakong katuyoan ang tanang panghitabo nga nahiagian ni Jesus. Usa ka Plano sa Gugma! Apan hangtod sa adlaw sa Pagkabanhaw kining tanan wala pa masayri sa mga Apostoles. 47ug nga sa iyang ngalan ang mensahe mahitungod sa paghinulsol ug sa pagpasaylo sa mga sala kinahanglan isang-yaw ngadto sa tanang mga nasod, sugod sa Jerusalem. Ang gikaeskandalohan sa mga “maayong tawo” kang Jesus mao kini: nga si Jesus mipabor sa mga makasasala, mga tinamay, mga babayeng nagbaligya og dungog, mga kabos, mga masakiton. Samtang ang Balaod nag-isip niini nga kining matanga sa mga tawo silotan sa Dios, si Jesus nagpadayag nga walay usa ka tawo nga dili mahiapil sa tanyag sa walay kinutubang pasaylo gikan sa Dios. Ang unibersal nga kapasayloan magsugod sa Jerusalem!

48Kamo mga saksi niining mga butanga.

Ang mga Apostoles, nga kanhi wala makasabot niini, nahimo na hinoong mga saksi niini! Ang adlaw sa pagkabanhaw maoy labing taas nga adlaw kay nagpadayon man kini hangtod sa eternidad. 49Ug ako mismo mao ang magpadala nganhi kaninyo sa gisaad sa akong Amahan. Apan kinahanglan maghulat kamo sa siyudad hangtod nga mokunsad kaninyo ang gahom gikan sa kahitas-an." Sa atong kaugalingon wala kitay igong mahimo. Nagkinahanglan kita og dugang nga gahom. Kining gahoma gisaad sa Amahan ug ipadala mismo ni Jesus ngari kanato. Taliwala sa daghang mga kaguliyang nga nahitabo sa kalibutan: dautan, kasamok, kagubot, pagkabahinbahin, pagpanglupig, walay kaangayan, pagpangdaot, kalamidad, kasakitan, disgrasya ug uban pa; bisan pa kon daw walay nahitabong kabag-ohan, apan ipadayon gayod ang pagdawat ug paggamit niining balaanong gahom nga gikan sa kahitas-an.

50Unya gidala niya sila ngadto sa gawas sa siyudad hangtod sa Betania, diin giisa niya ang iyang mga kamot ug gipanalanginan sila. 51Ug samtang siya nanalangin kanila, mibiya siya ug gibayaw ngadto sa langit. Miabot na ang panahon sa pagbiya ni Jesus gikan sa panon sa iyang mga tinun-an. Dinhi adunay gihimong pagpanalangin. Ang maong aksyon maoy kanunayng buhaton alang niadtong gibinlan og balaang tahas, sama nila ni Moises ug David. 52Gisimba nila siya ug unya mibalik sila sa Jerusalem nga malipayon kaayo. 53Nagkanunayan sila didto sa Templo ug nagpasalamat sa Dios. Wala na si Jesus uban kanila. Apan sila nagpabiling malipayon. Nagpabilin sila nga usa ka katilingban nga misimba kang Jesus! Si Jesus atua sa Langit. Ang mga tinun-an atua sa Templo!