Si Jesus miingon sa iyang mga tinun-an, "Ang nahigugma kanako magtuman sa akong gisugo. Mahigugma kaniya ang akong Amahan, ug ang akong Amahan ug ako moanha ug magpuyo diha kaniya. 24Ang wala mahigugma kanako dili motuman sa akong gisugo. Ang mensahe nga inyong nadungog dili akoa kondili iya sa Amahan nga nagpadala kanako.” 25"Gisultihan ko kamo niini samtang ako uban pa kaninyo. 24Ang Manlalaban, ang Espiritu Santo nga ipadala sa Amahan sa akong ngalan, magtudlo ug magpahinumdom kaninyo sa tanan nga akong gisulti kaninyo." 27“Ang kalinaw ibilin ko kaninyo; ang akong kalinaw ihatag ko kaninyo, kalinaw nga dili ingon sa ikahatag sa kalibutan. Ayaw kamog kabalaka ug ayaw kahadlok. 28Gisultihan ko na kamo nga mobiya ako, apan mobalik ako. Kon gihigugma ninyo ako, malipay kamo nga moadto ako sa Amahan, kay siya labaw man kanako. 29Gisultihan ko kamo niini karon sa wala pa kini mahitabo aron inigkahitabo niini, motuo kamo. Ang Ebanghelyo sa Ginoo.

oOo

KAHULOGAN SA EBANGHELYO (Juan 14:23-29)

Ang Ebanghelyo karon maoy labot sa gitawag og “farewell discourse” ni Jesus nga iyang gipahayag niadtong gabii sa katapusang panihapon (Huwebes Santo). Ang mga bersikulo nga atong mabasa karon maoy tubag ni Jesus sa pangutana ni Judas Tadeo (dili si Judas Escariote), “Ginoo, nganong ipaila mo man kanamo ang imong kaugalingon ug dili man hinuon ngadto sa katawhan?” (Juan 14:22). Ang daghang mga sinulat sa mga Judio sa panahon ni Jesus nagtug-an nga niadtong panahona ang mga katawhan nagpaabot og usa ka gamhanang Mangluluwas (Messiah) nga politikanhon nga mobuntog sa iyang mga kaaway. Mao usab kini ang gihunahuna sa mga Apostoles. 23Si Jesus miingon sa iyang mga tinun-an, "Ang nahigugma kanako magtuman sa akong gisugo. Mahigugma kaniya ang akong Amahan, ug ang akong Amahan ug ako moanha ug magpuyo diha kaniya.

Mao lamang kini ang bugtong paagi nga nahukman sa Dios nga iyang ikapadayag sa iyang kaugalingon ngadto sa mga katawhan: Moanhi siya aron sa pagpuyo sulod sa kasingkasing niadtong modawat ug motuo kaniya. Sa laing pagkasulti, ang Presensya sa Dios mailhan lamang kanila nga nahigugma kaniya. Dili mamugos ang Ginoo. Sa atong panahon karon adunay daghang mga tawo nga kunohay mituo sa Ginoo apan dili makiglabot sa Simbahan ug sa katilingbanong kinabuhi niini (Church community). Usa ka pananglitan ang dili pakiglabot sa Gagmayng Simbahanong Katilingbgan o GSK/BECs. Nagpabilin si Jesus nga wala tagda uban sa labing sayon nga pag-ingon, “Usa ako ka non-practicing believer”.

Mao kini ang dakong kalainan niadtong matuod nga tinun-an ni Jesus ug sa ubang tawo. Ang pagtuo nagkinahanglan og buhat. Kana tungod kay si Jesus makusganon man nga mipahayag nga dili lamang siya usa ka tawo nga bantugan nga nabuhi sa milabay na nga panahon kondili nga siya buhi karon pinaagi sa presensya sa iyang tinukod nga Simbahan. Ang misyon sa Simbahan mao gayod ang pagpadayag ug pagpuyo sa gugma ni Jesus! 23Ang nahigugma kanako magtuman sa akong gisugo... ang akong Amahan ug ako moanha ug magpuyo diha kaniya. Gipahayag ni Jesus nga siya makig-uban nganha kanila nga nahigugma kaniya. Mipahayag siya sa iyang pagka-Templo nga bisan kon gub-on apan iyang tukoron human sa tulo ka mga adlaw (Juan 2:19-22). Alang sa mga Judio ang Templo mao ang dapit nga ilang masinati ang presensya sa Dios.

24Ang wala mahigugma kanako dili motuman sa akong gisugo. Ang mensahe nga inyong nadungog dili akoa kondili iya sa Amahan nga nagpadala kanako.” Mao kini ang usa sa mga yawe sa pagsabot sa tinuod nga kinabuhing Kristohanon: Ang paghigugma inubanan sa pagpamati sa Pulong, usa ka sakramento sa presensya sa Dios. Bisan pa kon wala diha ang linawas nga presensya ni Jesus, nagpabilin ang iyang presensya diha sa iyang mga Pulong. Kining mga pulonga dili lamang kay nasabtan diha sa kaalam (intellectual) kondili labaw sa tanan gipuy-an (praxis). Misyon usab sa Simbahan ang pagwali ug pagpuyo sa maong Pulong. Usa kini ka hilabihang kadako nga kaakohan sa Simbahan.

25"Gisultihan ko kamo niini samtang ako uban pa kaninyo. 24Ang Manlalaban, ang Espiritu Santo nga ipadala sa Amahan sa akong ngalan, magtudlo ug magpahinumdom kaninyo sa tanan nga akong gisulti kaninyo." Ang pulong ni Jesus dili kabahin sa “butang” (something), kondili kabahin sa “usa ka Tawo (Someone). Mao nga bisan kon wala na diha si Jesus, adunay gipadalang Manlalaban nga maoy mogiya kanato sa pagpamati sa maong pulong. Dili masayop ang maong Manlalaban, ang Espiritu Santo, tungod kay ang Amahan, si Jesus ug ang Espiritu Santo usa lamang. Mao kini ang misteryo sa Santisima Trinidad: Tulo ka personas diha sa usa ka Dios! Mao kini ang walay kinutubang kahiusahan sa presensya sa Dios nga mabati kanato hangtod sa atong panahon karon ug sa umaabot. Ang Espiritu Santo maoy magtukmod sa Simbahan sa mga pagpamalandong ug paghukom kon unsay buhaton. Ang maong Espiritu Santo maoy motabang sa Simbahan sa pag-ugmad sa iyang kaugalingon diha sa pagpahaum sa mga timaan sa panahon (signs of the times).

27“Ang kalinaw ibilin ko kaninyo; ang akong kalinaw ihatag ko kaninyo, kalinaw nga dili ingon sa ikahatag sa kalibutan. Ayaw kamog kabalaka ug ayaw kahadlok. 28aGisultihan ko na kamo nga mobiya ako, apan mobalik ako. Shalom! Kalinaw nga maoy kasagaran nga paghimamatay sa mga Judio aron sa pag-ila sa ilang presensya sa matag usa. 28bKon gihigugma ninyo ako, malipay kamo nga moadto ako sa Amahan, kay siya labaw man kanako. 29Gisultihan ko kamo niini karon sa wala pa kini mahitabo aron inigkahitabo niini, motuo kamo. Samtang gisulti kini ni Jesus ngadto sa iyang mga tinun-an, sila wala gayod makasabot. Apan nasabtan ra nila kini uban tabang sa Espiritu Santo!