T 31Sa nakalakaw na si Judas, si Jesus miingon sa iyang mga tinun-an, “Karon ang himaya sa Anak sa Tawo gipadayag, ug ang himaya sa Dios gipadayag pinaagi kaniya. 32Ug kon ang himaya sa Dios gipadayag pinaagi kaniya, nan ang Dios magpadayag diha kaniya sa himaya sa Anak sa Tawo, ug kini iyang buhaton dayon. 33Mga anak, dili na ako magdugay uban kaninyo. Mangita kamo kanako, apan sultihan ko kamo karon sa akong gisulti sa mga Judio, ‘Dili kamo makaadto sa akong adtoan.” 34Maghatag ako kaninyog bag-ong sugo: paghigugmaay kamo. Ingon nga ako nahigugma kaninyo, paghigugmaay usab kamo. 35Kon maghigugmaay kamo, ang tanan nga kamo akong mga tinun-an. Ang Ebanghelyo sa Ginoo.

oOo

KAHULOGAN SA EBANGHELYO (Juan 13:31-35)

31aSa nakalakaw na si Judas, si Jesus miingon sa iyang mga tinun-an…

Mipakita si Jesus sa iyang pagka-gawasnon. Iyang gipadayag ang usa ka kamatuoran nga kutob niining panahona usa pa ka tinagoan. Ang presensya sa tinun-an nga magaluib kaniya daw nakapatuok kaniya. Iyang gihulat ang saktong panahon sa pagbutyag sa maong kamatuoran —sa diha nga nakalakaw na si Judas.

31b “Karon ang himaya sa Anak sa Tawo gipadayag, ug ang himaya sa Dios gipadayag pinaagi kaniya. 32Ug kon ang himaya sa Dios gipadayag pinaagi kaniya, nan ang Dios magpadayag diha kaniya sa himaya sa Anak sa Tawo, ug kini iyang buhaton dayon.

Si Jesus mipakita sa iyang pagkamalinawon taliwala sa nag-ungot nga kasakitan ug kamatayon nga ipahamtang unya kaniya gikan sa iyang mga kaaway. Ang kalinaw nga gikuptan ni Jesus maoy usa ka kalinaw nga dili maangkon sa unsa ka ordinaryong tawo. Mao kini unya ang matang sa kalinaw nga iyang ihatag ug ibilin sa iyang mga tinun-an sa panahon human sa iyang mahimayaong pagkabanhaw.

31b “Karon ang himaya sa Anak sa Tawo gipadayag… ang Dios magpadayag diha kaniya…

Ang dalan sa Kasakitan ug Kamatayon sa Krus gisugdan sa dihang mibiya si Judas kang Jesus ug sa mga kaubang Apostoles. Sugod usab niadto ang panahon sa pagpadayag sa himaya ni Jesus. Daan nang gilantaw ang sangputanan sa maong kasakitan nga walay lain kondili ang mahimayaong Kabanhawan!

33Mga anak, dili na ako magdugay uban kaninyo. Mangita kamo kanako, apan sultihan ko kamo karon sa akong gisulti sa mga Judio, ‘Dili kamo makaadto sa akong adtoan.”

Kining mga pulonga mga pulong nga hinukad gikan sa hilabihan ka malumong pagbati. Susama kining pagbatia sa usa ka inahan. Mao da kining panahona nga si Jesus namulong nga susama niini. Giisip niya ang mga tinun-an nga iyang kaugalingong mga anak!

34aMaghatag ako kaninyog bag-ong sugo: paghigugmaay kamo.

Mopalayo si Jesus gikan kanila. Apan mipasabot usab siya sa bag-ong paagi nga mapadayon ang iyang pakig-uban kanila. Ang presensya ni Jesus magpabilin kon anaa ang gugma!

34bIngon nga ako nahigugma kaninyo, paghigugmaay usab kamo.

Dinhi gipadayag ni Jesus ang matang sa tinuod nga gugma. Dili gugmang lumalabay, kondili gugmang tiunay!

35Kon maghigugmaay kamo, ang tanan nga kamo akong mga tinun-an.

Sa ika-tulo nga higayon iyang gilitok ang kasugoan sa gugma. Tinuyo kini aron makakat-on gayod kita kon unsay matuod nga timaan sa atong pagka-Kristohanon: Paghigugma!