Human niini, nagpakita na usab si Jesus sa iyang mga tinun-an didto sa Lanaw sa Tiberias. Ang iyang pagpakita ingon niini: 2nagkatigom sila si Simon Pedro, si Tomas (nga ginganlag Kaluha),si Natanael (nga taga-Cana sa Galilea), ang mga anak ni Sebedeo, ug ang duha ka laing tinun-an. 3Miingon kanila si Simon Pedro, "Managat ako." Sila miingon, "Mouban kami." Busa nanlakaw sila ug nanakay sa sakayan; apan wala gayod silay nakuha tibuok gabii. 4Sa pagsubang na sa adlaw, nagbarog si Jesus didto sa lapyahan, apan wala makaila ang mga tinun-an nga si Jesus diay kadto. 5Unya mii-ngon siya kanila “Mga higala, nakakuha ba kamo?" Sila mitubag, "Wala gayod." 6Siya miingon kanila, "Itaktak ang inyong pukot dapit sa tuo sa sakayan ug makakuha kamo." Busa gitaktak nila ang ilang pukot ug wala na sila makadaog pagbira niini, kay daghan man kaayo ang ilang nakuha. 7Ang tinun-an nga gimahal ni Jesus miingon kang Pedro, "Ang Ginoo kana!" Sa pagkadungog ni Simon Pedro nga ang Ginoo diay kadto, gitapis niya ang iyang sapaw, kay naghubo man siya, ug miambak sa tubig. 8Ang ubang mga tinun-an nangadto sa lapyahan sakay sa sakayan, nagbira sa pukot nga puno sa isda. Dili sila layo kaayo sa lapyahan — mga kasiyaman ka metros lamang. 9Sa pagkawas na nila, nakita nila didto ang usa ka tapok sa binagang uling nga may isda nga gisugba ug may pan usab. 10Unya miingon si Jesus kanila, “Pagdala kamo diri og pipila ka buok sa isda nga inyong nakuha.” 11Busa misakay si Simon Pedro ug gibira niya sa lapyahan ang pukot nga napuno sa mga dagkong isda; usa ka gatos ug kalim-an ug tulo kabuok ang tanan. Apan bisan pa sa kadaghan sa ilang nakuha, wala gayod magisi ang pukot. 12Unya miingon si Jesus kanila, "Dali ngari ug pangaon kamo." Walay usa sa mga tinun-an nga nangahas pagpangutana kaniya kon kinsa siya, kay nakaila man sila nga siya mao ang Ginoo. 13Busa miduol si Jesus ug gikuha niya ang pan ug gihatag kanila; gihatag usab niya ang isda, 14Ikatulo kining pagpakita ni Jesus ngadto sa mga tinun-an human siya mabanhaw. Ang Ebanghelyo sa Ginoo.

oOo

KAHULOGAN SA EBANGHELYO (Juan 21:1-14)

1Human niini, nagpakita na usab si Jesus sa iyang mga tinun-an didto sa Lanaw sa Tiberias. Ang iyang pagpakita ingon niini: 2nagkatigom sila si Simon Pedro, si Tomas (nga ginganlag Kaluha), si Natanael (nga taga-Cana sa Galilea), ang mga anak ni Sebedeo, ug ang duha ka laing tinun-an. 3aMiingon kanila si Simon Pedro, "Managat ako." Sila miingon, "Mouban kami." Ang Pagkabanhaw kinahanglan nga puy-an diha sa matag adlaw nga kasinatian sa kinabuhi. Ang pito ka mga Apostoles mibalik sa ilang naandang buluhaton sa pagpangisda. Apan wala na mahiuban kanila si Jesus. Usa ka makahuluganong simbolo nga si Pedro mao ang nangulo kanila. 3bBusa nanlakaw sila ug nanakay sa sakayan; apan wala gayod silay nakuha tibuok gabii. Ang pagpangisda kasagaran nga himoon panahon sa kagabihon. May katuyoan si Juan sa pagsaysay sa mga detalye niini. Panahon sa kangitngit wala silay nahimo. Sayang ang nausikan nilang panahon. Mao usab kini ang mahitabo kon anaa kita sa kangitngit. Wala kitay mahimo. 4Sa pagsubang na sa adlaw, nagbarog si Jesus didto sa lapyahan, apan wala makaila ang mga tinun-an nga si Jesus diay kadto.

Ang pito ka mga tinun-an nga anaa taliwala sa kangitngit nanagat. Sa panabot sa mga Judio ang “dagat” maoy usa ka gikahadlokang dapit kay anaa sa palibot niini ang gikalisangang mga kaaway. Apan si Jesus nagbarog sa “lig-ong sukaranan” panahon sa pagsubang sa adlaw. Ania dinhi ang paglarawan sa duha ka managlaing kasinatian: samtang anaa kita sa kahadlok, atua usab si Jesus naghulat kanato sa pikas bahin sa lapyahan. Anaa si Jesus, apan wala sila makaila kaniya. 5Unya miingon siya kanila “Mga higala, nakakuha ba kamo?" Sila mitubag, "Wala gayod." 6Siya miingon kanila, "Itaktak ang inyong pukot dapit sa tuo sa sakayan ug makakuha kamo." Busa gitaktak nila ang ilang pukot ug wala na sila makadaog pagbira niini, kay daghan man kaayo ang ilang nakuha. Nasayran na ni Jesus ang ilang kapakyasan. Busa mihimo siyag lakang aron sa pagtabang kanila. Kini iyang gihimo taliwala sa unsay ilang gibuhat.

7Ang tinun-an nga gimahal ni Jesus miingon kang Pedro, "Ang Ginoo kana!" Sa pagkadungog ni Simon Pedro nga ang Ginoo diay kadto, gitapis niya ang iyang sapaw, kay naghubo man siya, ug miambak sa tubig. Pag-ambak! Unya paglangoy! Dinhi makita nato ang pagka-dalidalion ni Pedro. Apan si Juan mao ang una nga nakaila kang Jesus. Susama kini sa ilang pagdagan padulong sa lubnganan sayo sa Domingo sa Pagkabanhaw. Si Juan maoy unang miabot sa dapit, apan si Pedro maoy iyang unang gipasulod. 8Ang ubang mga tinun-an nangadto sa lapyahan sakay sa sakayan, nagbira sa pukot nga puno sa isda. Dili sila layo kaayo sa lapyahan — mga kasiyaman ka metros lamang. Niining detalyadong pagtaho sa unsay nahitabo, makita nato ang pagka-insakto sa ilang pagsaksi. 9Sa pagkawas na nila, nakita nila didto ang usa ka tapok sa binagang uling nga may isda nga gisugba ug may pan usab. 10Unya miingon si Jesus kanila, “Pagdala kamo diri og pipila kabuok sa isda nga inyong nakuha.” Laing detalye. Si Jesus mao ang nag-andam sa pagkaon alang kanila. Usa kini ka tinuyoang pagpangandam og pagkaon. Ang mga Apostoles naghalad sa ilang kuha nga mga isda. Ug si Jesus midapit kanila sa maong pagpangaon.

Dinhi nahinumdum sila sa Katapusang Panihapon. Sa atong panahon mao kini ang Eyukaristiya o ang Sakramento sa Pagkalawat. 11Busa misakay si Simon Pedro ug gibira niya sa lapyahan ang pukot nga napuno sa mga dagkong isda; usa ka gatos ug kalim-an ug tulo ka buok ang tanan. Apan bisan pa sa kadaghan sa ilang nakuha, wala gayod magisi ang pukot. Gipakita ni Pedro ang pagtahan sa iyang kaugalingon pinaagi sa aksyon: ang pagpangulo ug pagpangalagad sa Simbahan, ang pukot nga dili magisi. 12Unya miigon si Jesus kanila, "Dali ngari ug pangaon kamo." Walay usa sa mga tinun-an nga nangahas pagpangutana kaniya kon kinsa siya, kay nakaila man sila nga siya mao ang Ginoo. Kining bahina sa Ebanghelyo natingban sa pagka-kahibulongan o pagka-misteryoso. Si Jesus sa kanhiay walay kalainan sa kang Jesus nga karon nabanhaw. Apan anaa usab ang dakong kalainan sa iyang pagkakanhi ug sa iyang pagkakaron. Kini mao ang gitawag og “O Kurios”, nga sa ato pa “Ang Ginoo”. Mao ra siya; apan may kalainan! 13Busa miduol si Jesus ug gikuha niya ang pan ug gihatag kanila; gihatag usab niya ang isda. 14Ikatulo kining pagpakita ni Jesus ngadto sa mga tinun-an human siya mabanhaw. Usa ka tinuod nga panagsalo sa pagkaon! Usa usab ka pagkaon nga mistiko! Angay nga atong hinumduman ang taas nga pagtulun-an bahin sa Pan panahon sa Katapusang Panihapon. Sa panahon nga gisulat kini ni Juan ang simbolo sa pagka-Kristyano mao ang timaan sa usa ka Isda.