Sayo sa Domingo sa buntag, samtang ngitngit pa, si Maria Magdalena miadto sa lubnganan ug nakita niya nga ang bato naligid na gikan sa baba sa lubnganan. 2Midagan siya ug miadto kang Simon Pedro ug sa tinun-an nga gimahal ni Jesus, ug giingnan niya sila, "Gikuha nila sa lubnganan ang Ginoo ug wala kami mahibalo kon hain nila ibutang siya!" Unya si Pedro ug ang laing tinun-an nangadto sa lubnganan. 4Nagdagan silang duha, apan ang maong tinun-an mas kusog nga midagan kay kang Pedro ug nahiuna pag-abot sa lubnganan. 5Mitikubo siya ug iyang nakita ang panapton nga lino, apan wala siya mosulod. 6Miabot si Simon Pedro sunod kaniya, ug midiritso siya ngadto sa lubnganan. Ug nakita niya didto ang panapton nga lino, 7ug ang panapton nga giputos sa ulo ni Jesus. Wala kini mahitipon sa panapton nga lino kondili gilukot ug gilain pagbutang. 8Unya kadtong tinun-an nga nahiuna pag-abot sa lubnganan misulod usab ug nakakita siya ug mituo. (9Wala gihapon sila makasabut sa bahin sa Kasulatan nga nag-ingon nga mabanhaw siya.) 10Unya namauli ang mga tinun-an. Ang Ebanghelyo sa Ginoo.

oOo

KAHULOGAN SA EBANGHELYO (Juan 20:1-9)

Sayo sa Domingo sa buntag, samtang ngitngit pa…

Nagkahiusa ang upat ka mga Ebanghelista sa ilang taho nga ang Pagkabanhaw nahitabo sa adlawng Domingo.

1bsi Maria Magdalena miadto sa lubnganan…

Ang mga Ebanghelista nagkahiusa usab niining maong saysay nga ang mga babaye mao ang unang nakakaplag sa panghitabo sa Pagkabanhaw. Si Maria Magdalena mao ang gihimong sentro sa maong sugilanon sumala kang Juan. Siya mao ang unang gipakitaan ni Jesus nga nabanhaw (Juan 20:11-18). nakita niya nga ang bato naligid na gikan sa baba sa lubnganan. 2aMidagan siya ug miadto kang Simon Pedro ug sa tinun-an nga gimahal ni Jesus…

“Midagan” siya. Kining maong detalye may dakong kahulogan. Wala pa niya makita si Jesus. Wala pa siya mutuo. Siya hinoon na-

tingala! Ug midagan siya aron pagtaho sa mga Apostoles sa panghitabo. Gihisgutan ang mga ngalan ni Pedro ug ang tinun-an nga gimahal ni Jesus nga sumala sa tradisyon mao si Juan nga maoy nagsulat niining maong Ebanghelyo. Kining maong detalye may kahulogan usab. giingnan niya sila, "Gikuha nila sa lubnganan ang Ginoo ug wala kami mahibalo kon hain nila ibutang siya!" Sa kalibog ni Maria Magdalena, siya mihimog usa ka pangagpas: nga ang lawas ni Jesus gikuha. Ang pagkawagtang sa lawas ni Jesus sulod sa lubnganan o empty tomb dili mao ang sukaranan sa Pagkabanhaw. Apan mao kini ang sinugdanan sa dugang nga pagpangita sa kamatuoran kon unsa gayoy nahitabo sa lawas nga dili na makit-an sulod sa lubnganan. Ang walay sulod nga lubnganan nahimong usa ka hagit!

Unya si Pedro ug ang laing tinun-an nangadto sa lubnganan. 4Nagdagan silang duha, apan ang maong tinun-an mas kusog nga midagan kay kang Pedro ug nahiuna pag-abot sa lubnganan. Si Juan may dakong kasayoran sa panghitabo tungod kay didto siya. Apan ang pag-ingon nga si Pedro naapsan kang Juan sa pagdagan tungod kay si Juan batan-on pa ug si Pedro gulang na, dili pa igong rason nga angay dawaton. Aduna pay mas mahinungdanong simbolo nga nagpaluyo niini nga angay usab natong tukion.

5Mitikubo siya ug iyang nakita ang panapton nga lino, apan wala siya mosulod. 6Miabot si Simon Pedro sunod kaniya ug midiritso siya ngadto sa lubnganan. Ug nakita niya didto ang panapton nga lino, 7ug ang panapton nga giputos sa ulo ni Jesus. Wala kini mahitipon sa panapton nga lino kondili gilukot ug gilain pagbutang. Kon ang panapton nga giputos sa ulo ni Jesus, matud pa sa saksi ni Juan, wala mahitipon sa panapton nga lino kondili ilukot ug gilain pagbutang, kana nagpasabot nga wala gayoy usa ka kamot sa tawo nga nahimong hinungdan sa maong talan-awon. Walay kamot nga mihilam sa mga lino. Ug labaw sa tanan, ang lawas ni Cristo wala kahilabti kang bisan kinsa. Daw nahanaw sa iyang kaugalingon ang lawas ni Jesus.

Unya kadtong tinun-an nga nahiuna pag-abot sa lubnganan misulod usab…

Si Juan misulod usab sa lubnganan aron sa pagsusi niini. Ang iyang nasaksihan dili gayod malalis. Si Juan adunay dakong tuyo ngano nga iya kining gitaho nga detalyado gayod!

nakakita siya ug mituo.

Si Pedro wala pay nasabtan kabahin sa panghitabo. Sa saysay sumala ni Lukas, si Pedro “nahibulong kon unsa gayod ang nahitabo” (Lukas 24:12). Si Maria Magdalena mihatag og tinawhanong pagpasabot: "Gikuha nila sa lubnganan ang Ginoo” Juan 20:2). Si Pedro wala makasabot. Sa laing bahin si Juan, tungod sa iyang nakita, mituo! Unsa man ang iyang nakita? Walay duda nga ang nakita ni Pedro sama usab sa nakita ni Juan. Apan si Pedro wala lang makatugkad sa saktong kahulogan niini. Diha sa pagtuo, ang mga mata sa ka-singkasing gikinahanglan pag-ayo. Kining mataha mao ang mga mata sa gugma. Gumikan niining maong mata sa gugma si Juan wala magpanuko sa paglarawan sa iyang kaugalingon nga tinun-an nga gimahal ni Jesus. Tungod sa maong matang sa gugma si Juan midagan nga mas kusog! Didto sa kabaybayonan sa lanaw, si Juan usab mao ang unang nakaila nga kadtong nag-lakaw ibabaw sa tubig mao si Jesus (Juan 21:7).

Dinhi mapamatud-an nato ang usa ka kamatuoran nga ang Pagtuo molihok ug malig-on kon adunay gugma. Sama niadtong naghupot og mga katungdanan sa Simbahan, alang kanila ang labing mahi- nungdanon dili mao ang pag-angkon og gahum kondili ang pagpakita og gugma. Wala gihapon sila makasabut sa bahin sa Kasulatan nga nag-ingon nga mabanhaw siya.) 10Unya namauli ang mga tinun-an. Ang nakit-an dili pa diay igo sa pagtuo. Gikinahanglan pa ang dugang nga pagtuki sa kahulogan!