Nota: Ang Ebanghelyo nga gipatik mao ang basahon atol sa Paghandum sa Pagsulod ni Jesus sa Jerusalem kon sa Kasaulogan sa Bendita sa Lukay.

EBANGHELYO (Lukas 19:28-40)

28Si Jesus mipadayon ngadto sa Jerusalem nga nag-una kanila. 29Sa nagkaduol siya sa Betpahe ug Betania, didto sa Bungtod sa mga Olivo, gipadala niya pag-una ang duha niya ka tinun-an 30uban niining tugon: “Lakaw kamo ngadto sa balangay nga anaa sa unahan, ug inigsulod ninyo inyong makaplagan ang usa ka nating asno nga gihigot, nga wala pa kakabay-i. Badbari ninyo kini ug dad-a dinhi. 31Kon may mangutana kaninyo ngano nga inyo kining gibadbaran, ingna siya: 'Nagkinahanglan niini ang Magtutudlo.’ 32Ug miadto sila ug ilang nakaplagan ang tanan sumala gayod sa gisulti ni Jesus kanila. 33Samtang nagbadbad sila sa asno, nangutana ang mga tag-iya niini, “Nganong inyo man kanang gibadbaran?” 34Unya mitubag sila, "Nagkinahanglan niini ang Magtutudlo.” 35Ug ilang gidala ang asno ngadto kang Jesus. Unya ilang gihapin sa bukobuko sa asno ang ilang mga kupo ug gitabangan nila si Jesus pagpakabayo niini. 36Samtang nagkabayo siya, gibakbak sa mga tawo ang ilang mga kupo diha sa dalan nga iyang agian.

37Sa nagkaduol na siya sa Jerusalem, sa dapit diin ang dalan naglugsong sa Bungtod sa mga Olibo, ang dakong panon sa iyang mga sumusunod nagsugod pagpasalamat ug pagdayeg sa Dios sa kusog nga tingog tungod sa dagkong mga butang nga ilang nakita: 38"Dalaygon ang hari nga mianhi sa ngalan sa Ginoo! Pakigdait didto sa langit ug dalaygon ang Dios!” 39Unya pipila sa mga Pariseo miingon kang Jesus, "Magtutudlo, pahiloma ang imong mga tinun-an!” 40Ug si Jesus mitubag kanila, "Sultihan ko kamo nga kon maghilom sila, maninggit ang mga bato." Ang Ebanghelyo sa Ginoo.

oOo

KAHULOGAN SA EBANGHELYO (Lukas 19:28-40)

28Si Jesus mipadayon ngadto sa Jerusalem nga nag-una kanila. Si Jesus nagpadulong ngadto sa Jerusalem. Gikan siya sa Jerico. Kini may gilay-on nga mga napulog pito (17) ka mga kilometro. Ang Jerusalem mao ang iyang katapusan nga dapit nga iyang pagaadtoan. Usa sa mga gihimo sa mga daghang propeta, kon ugaling ang ilang mga gipamulong walay epekto sa mga naminawng katawhan niini, mao ang pagpakita og talan-awon nga ipaagi sa drama o dramatic action. Ang maong madrama nga talan-awon mao ang magdala sa ilang mensahe nga masabtan sa mga katawhan. Ug wala gayoy makasud-ong niining talan-awon nga dili makatugkad kon unsay buot ipasabot niini. Nahulagway kining susamang madramang talan-awon sa Daang Tugon (1 Hari 11:29-31; Jeremias 13:1-11; 27: 1-11; Ezekiel 4:1-3; 5: 1-4).

Mao usab kini ang diha sulod sa hunahuna ni Jesus sa saysay nga atong mabasa niining bahina sa Ebanghelyo.

29Sa nagkaduol siya sa Betpahe ug Betania, didto sa Bungtod sa mga Olibo, gipadala niya pag-una ang duha niya ka tinun-an 30uban niining tugon: “Lakaw kamo ngadto sa balangay nga anaa sa unahan, ug inigsulod ninyo inyong makaplagan ang usa ka nating asno nga gihigot, nga wala pa kakabay-i. Badbari ninyo kini ug dad-a dinhi. 31Kon may mangutana kaninyo ngano nga inyo kining gibadbaran, ingna siya: 'Nagkinahanglan niini ang Magtutudlo.’ Ang madramang talan-awon nga giplano ni Jesus nagasugod sa iyang pagsakay sa usa ka nating asno. Kini mao ang magpatataw sa mensahe nga siya mao ang Manunubos, nga dinihogan isip usa ka Hari sa Dios. 32Ug miadto sila ug ilang nakaplagan ang tanan sumala gayod sa gisulti ni Jesus kanila. Ang maong plano ni Jesus iya gayong makuti nga gipangandaman. Dili kadto dinalidali nga buluhaton. Dili kadto usa ka kalit nga hukom sa kaugalingon. 33Samtang nagbadbad sila sa asno, nangutana ang mga tag-iya niini, “Nganong inyo man kanang gibadbaran?” 34Unya mitubag sila, "Nagkinahanglan niini ang Magtutudlo.”

Bisan mismo ang tag-iya sa maong gibadbaran nga asno nasayod nang daan sa sekretong pulong sa kamatuoran o password nga mao ang “Nagkinahanglan niini ang Magtutudlo.” Kining mga pulonga sinabutan nang daan tali kang Jesus ug sa tag-iya. 35Ug ilang gidala ang asno ngadto kang Jesus. Unya ilang gihapin sa bukobuko sa asno ang ilang mga kupo ug gitabangan nila si Jesus pagpakabayo niini. 36Samtang nagkabayo siya, gibakbak sa mga tawo ang ilang mga kupo diha sa dalan nga iyang agian. Ang maong aksyon maoy usa ka mahimayaong pagsupak sa unsay naandan. Niadtong panahona diha na ang laraw sa mga kaaway ni Jesus nga siya pangitaag sayop aron madakop ug mahamtangan og silot. Aduna nay gipahimutang nga presyo ang iyang ulo. Gibali-wala ni Jesus kining maong kamatuoran. Mahimo unta nga siya molikay o motago. O kaha mosulod gihapon sa Jerusalem, apan sa usa ka paagi nga dili dayag ug dili mamatikdan sa kadaghanan. Apan nagpalahi siya. Ang iyang kaugalingon maoy mahimong sentro sa pagtagad sa tanan. Daw dili mao kini ang kasagaran nga mahitabo—diin ang usa ka giisip nga kriminal sa labing dayag mangahas pagsulod sa usa ka dapit diin ang tanang mga mata makasud-ong kaniya. Dinhi mapamatud-an nato ang tumang kaisog nga gibatunan ni Jesus.

37Sa nagkaduol na siya sa Jerusalem, sa dapit diin ang dalan naglugsong sa Bungtod sa mga Olibo, ang dakong panon sa iyang mga sumusunod nagsugod pagpasalamat ug pagdayeg sa Dios sa kusog nga tingog tungod sa dagkong mga butang nga ilang nakita: 38"Dalaygon ang hari nga mianhi sa ngalan sa Ginoo! Pakigdait didto sa langit ug dalaygon ang Dios!” Ang gibuhat ni Jesus maoy usa ka tinuyo nga pagpaila sa iyang kaugalingon ngadto sa tanan nga siya usa ka Hari! Mao kini ang gilarawan sa basahon ni Zacarias (Zac 9:9). Taliwala niining tanan wala hikalimti ni Jesus ang tinuod nga paglarawan sa matang sa iyang pagkahari o sa pagkalinaing paagi sa iyang pagkahari. Ang asno wala isipa nga labing ubos sa mga mananap niadtong dapita, kondili usa ka mananap nga adunay talagsaong dungog. Sa panahon sa gubat, ang mga hari mosakay sa mga kabayo. Apan sa panahon sa kalinaw, ang mga hari magsakay sa asno. Sa maong aksyon gipadayag ni Jesus nga siya mianhi sa kalibutan isip usa ka hari sa gugma ug kalinaw, ug dili usa ka mubuntog nga bayaning sundalo nga maoy gipaabot sa kasagarang mga katawhan sa Israel. 39Unya pipila sa mga Pariseo miingon kang Jesus, "Magtutudlo, pahiloma ang imong mga tinun-an!” 40Ug si Jesus mitubag kanila, "Sultihan ko kamo nga kon maghilom sila, maninggit ang mga bato." Ania ang usa ka katapusang paghangyo. Daw si Jesus nagpakiluoy diha sa pag-ingon, “Karon dili pa ba kamo makadawat kanako nga usa ka Hari?” Bisan sa iyang giatubang nga kasilag sa mga tawo, si Jesus mitanyag hinoon ngadto kanila og gugma!