EBANGHELYO (Mt 5: 13-16)
KINUTLO GIKAN SA EBANGHELYO SUMALA NI SAN MATEO
Si Jesus miingon sa iyang mga tinun-an, 13 "Kamo ang asin sa katawhan. Kon ang asin kawad-an sa iyang kaparat, unsaon pa man pagpabalik sa kaparat niini? Kini wala nay kapuslanan ug angay na lamang isalibay ug tunob-tunoban sa mga tawo." 14 "Kamo ang kahayag sa katawhan. Ang siyudad nga nahimutang sa bungtod dili gayod matago. 15 Walay magdagkot og suga aron lamang tagoan sa gan-tangan, kondili ibutang gayod sa tungtunganan aron makadan-ag sa tanan nga anaa sa balay. 16 Busa ipadan-ag gayod ang inyong kahayag atubangan sa mga tawo, aron makita nila ang inyong mga maayong buhat ug magdayeg sila sa inyong Amahan nga atua sa langit." Ang Ebanghelyo sa Ginoo.
oOo
KAHULOGAN SA EBANGHELYO ( Mt 5: 13-16 )
13a Si Jesus miingon sa iyang mga tinun-an, “Kamo ang asin sa katawhan.
Kadtong mga kabus, nagsubo, masinugtanon sa kabubut-on sa Dios, nagtinguha sa pagtuman sa gisugo sa Dios, magmaloloy-on, maputli og kasingkasing, na-ningkamot sa panagdait sa katawhan, gilutos gumikan sa ilang pagtuman sa gisugo sa Dios, mga gibugalbugalan ug gidaogdaog, ug gibutangbutangan sa tanang matang sa kadaotan tungod kay nagsunod kang cristo—matud pa ni Cristo “Kamo ang asin sa katawhan.” Kining maong larawan puno sa mga kahulogan. Sa panahon ni Cristo, ang asin, sinagolan sa tai sa mga mananap, gigamit isip abuno kon fertilizer alang sa pagpaani sa mga tanom. Sa atong panahon karon, ang asin gigamit alang sa pagpreserbar sa mga pagkaon. Apan ang labing kasagaran nga kagamitan sa asin mao ang pagpalami. Kon walay asin ang pagkaon walay lami.
Unsa man diay ang kagamitan sa Pagtuo alang sa kausaban o kabag-ohan sa atong kinabuhi? Unsa man diay ang Pagtuo niadtong mipuyo subay sa gitudlo ni Jesus mahitungod sa mga tawo nga mga “Bulahan” ? Adunay tubag si Jesus: “Kini ang maghatag og kalami sa kinabuhi.” Sa kinabuhi ta karon ato pa bay matawag og “adunay kalami”? Dili kaha tungod kay nawad-an kita niining maong “kalami” nga sa makadaghan atong nasinati ang mga dautan nga panghitabo sa atong katilingban? 13b Kon ang asin kawad-an sa iyang kaparat, unsaon man pagpabalik sa kaparat niini? Kini wala nay kapuslanan ug angay na lamang isalibay us tunobtunoban sa mga tawo.” Si Jesus naghangyo sa iyang mga tinun-an sa paghatag og kalami. Ang Kristiyanos nga nawad-an sa “lami alang sa Dios” matud pa “wala nay kapuslanan”. Matud pa ni Paul Claudel, usa ka magsusulat, “Ang Ebanghel-yo usa ka asin, apan atong gihimo kini nga tam-is.” Ang asin sa atong kinabuhi, dili kini gumikan sa atong kaayo kon dili tungod sa kaayo sa Dios diha kanato.
14a “Kamo ang kahayag sa katawhan...
Kon walay kahayag, wala usay mga kolor, walay katahom, walay kinabuhi. Ang kaalam sa siyensya (science) nagtudlo kanato nga ang adlaw mao ang tinubdan sa tanang enerhiya (energy) nga ania sa atong planeta. Kon walay kahayag sa adlaw wala gayo'y motungha nga kinabuhi sa atong kalibutan. Ang adlaw giila nga mao ang labing tataw nga timaan sa Dios, kinsa mao ang tinubdan sa tanang kinabuhi. 14b Ang siyudad nga nahimutang sa bungtod dili gayod matago. 15 Walay magdagkot og suga aron lamang tagoan sa gantangan, kondili ibutang gayod sa tungtunganan aron makadan-ag sa tanan nga anaa sa balay. Gikan sa kabaybayonan sa Galilea, usa ka lungsod nga gitawag og Sahed makita tu-ngod kay kini anaa mahimutang sa puntod. Sa panahon sa adlaw tataw kaayo ang mga balay niini tungod sa silaw sa adlaw; samtang sa gabii makita usab ang mga kahayag niini gikan sa ilang mga lampara. Samtang diha sa sulod sa panimalay anaa gayod ang lampara nga kon panahon sa kangitngit dagkotan aron makahatag og kahayag.
Mao kini ang larawan nga buot pahitabuon ni Jesus sa matag usa kanato. “Pagdan-ag!” Apan kining maong pagdan-ag wala magpasabot nga kita “mopakita lamang sa mga katawhan sa atong kaayo”, kondili sa pagpakita sa kaayo sa Dios diha kanato. Ang pagdan-ag mao ang pagpakita sa gahum sa Dios nga milihok dinhi kanato (tan-awa sa Mt. 6:1,6; ug 2 Cor. 4:6-7 ). 16 Busa ipadan-ag gayod ang inyong kahayag atubangan sa mga tawo, aron makita nila ang inyong mga maayong buhat ug magdayeg sila sa inyong Amahan nga atua sa langit.” Sa unang higayon sa Ebanghelyo sumala ni San Mateo, nadungog nato nga si Jesus mihisgot mahitungod sa “inyong Amahan nga atua sa langit” . Niining maong bersekulo makit-an na nato ang sentro sa iyang kinabuhi. Si Jesus mao ang labing nakatuman sa iyang walay-paghatag og himaya sa iyang kaugalingon. Ang tanan iyang giisip nga nagagikan ug nagpadulong sa langitnong Amahan.
|
