EBANGHELYO (Mateo 1:18-24)
18 Mao kini ang kaagi sa pagkatawo ni Jesukristo. Ang iyang inahan nga si Maria sinayoran ni Jose, apan sa wala pa sila magtipon nakamatikod si Maria nga nagsabak siya sa lalang sa Espiritu Santo. 19 Si Jose nga iyang pamanhonon, tawo nga matarong, apan dili siya buot nga pakaulawan niya si Maria atuba-ngan sa mga tawo, busa naglaraw siya sa pagpakigbulag kaniya sa hilom. 20 Samtang naghunahuna siya niini, mipakita kaniya ang usa ka anghel sa Ginoo pinaagi sa damgo ug miingon: "Jose, kaliwat ni David, ayaw kahadlok pagpa-ngasawa kang Maria, kay ang iyang gisabak lalang sa Espiritu Santo. 21 Manganak siyag batang lalaki ug nganli siyag Jesus—kay luwason niya ang iyang katawhan sa ilang mga sala.” 22 Ug kining tanan nahitabo aron matuman ang giingon sa Ginoo pinaagi sa propeta, 23 "Ang usa ka babayeng ulay magmabdos ug moanak og lalaki, ug nganlan siyag Emmanuel" (nga sa ato pa, "Ang Dios ania uban kanato”). 24 Busa sa pagmata ni Jose gituman niya ang gisugo sa anghel ug gipangasawa niya si Maria. Ang Ebanghelyo sa Ginoo.
KAHULOGAN SA EBANGHELYO (Mateo 1:18-24)
18a Mao kini ang kaagi sa pagkatawo ni Jesu-kristo. “Genesis” nga sa ato pa “sinugdanan”. Mao kini ang unang pulong nga atong mabasa diha sa Bibliya, sa paghulagway sa sinugdanan sa kalibutan. Ang mga Hudeo nagtuo nga ang tawo nagalakip sa sinugdan sa lawas ug espiritu—dili sama sa mga Griego nga nagtuo nga ang tawo una sa tanan kalag (soul) nga nahimong tawo diha sa pagsagop sa lawas. Mao nga si Jesus nagsugod sa Iyang kinabuhi diha sa iyang lawas sa panahon nga Siya nahiabot dinhi niining kalibutana. 18b Ang iyang inahan nga si Maria sinayoran ni Jose… Unsa man ang ilang nihimutangan sa sinugdanan? Duha ka mga binuhat nga nagplano sa pagminyo. Sama sa tanan nga mga batan-on nga nagplano sa pagminyoay, anaa ang tumang kalipay! 18c … apan sa wala pa sila makasal si Maria nakamatikod nga siya moanak pinaagi sa Espiritu Santo. 19 Si Jose nga iyang pamanhonon, tawo nga matarong, apan dili siya buot nga pakaulawan niya si Maria atubangan sa mga tawo, busa naglaraw siya sa pagpakigbulag kaniya sa hilom. Ug unya sa kalit ang plano daw adunay babag. Usa ka krisis! Si Jose nasayod nga ang iyang pangasaw-onon nagmabdos. Ang iyang damgo daw napusgay. Ug tungod niana, si Jose naglaraw nga si Maria iyang bulagan sa hilom. Usa ka desisyon gikan sa usa ka tawo nga matarong.
Matud pa sa mga eksperto, si Jose nasayod sa kahimtang ni Maria gumikan kay si Maria mismo mao ang nagsulti kaniya. Sa iyang pagkasayod nga kining bata nga gisabak ni Maria dili iyaha, dili gayod usab siya, tungod sa iyang katarong, nga moangkon sa unsay dili iyaha. 20a Samtang siya naghunahuna niini, usa ka anghel sa Ginoo mipakita kaniya pinaagi sa damgo ug miingon: “Jose, kaliwat ni David, ayaw kahadlok pagpangasawa kang Maria… Ang Ginoo mismo maoy mihimog pagsumpo sa laraw ni Jose. Aron molutaw ang pagkabalaanon sa mga kamot sa Dios sa nahimutangan kang Maria, ang maong pagpatataw sa Dios ngadto kang Jose gipaagi sa usa ka damgo. Si Jose, bisan pa sa iyang pagkayanong panday giila nga kaliwat ni David. Ug tungod kay siya kaliwat man sa mga hari sa Israel mao nga ang Dios naghangyo kaniya sa pag-usab sa iyang hukom sa pagbiya kang Maria. Hinoon si Jose kinahanglan nga modawat niining bata isip usa ka “gasa” diha sa “pagtuo”, inay nga iyang isalikway uban sa “tinawhanong paghukom”. 20b … kay ang iyang gisabak lalang sa Espiritu Santo. 21a Siya manganak og bata nga lalaki ug hinganlan mo siyag Jesus…
Ang anghel mipatataw kaniya sa unsa gayoy nahitabo kang Maria. Dili lamang kay si Jose modawat sa kamatuoran nga iya kining bataa sa Dios, kondili nga siya magpakaamahan kaniya diha sa paghatag niini og ngalan. Ang Dios mitugyan ngadto kang Jose og duha ka mga tahas: Ang una, sa pagdawat kang Maria, ug ang ika-duha, sa paghatag og ngalan sa bata. Ang paghatag og ngalan sa bata maoy usa ka katungod, sumala sa balaod sa mga Judeo, gikan lamang sa Amahan. Dinhi matuman ang gisaad sa mga propeta nga ang Mangluluwas gikan sa usa ka harianong laray (tan-awa sa Mateo 1:1, 9:27, 12:23, 20:31). Tinuod gayod nga si Jose “matarong”. Human niya mahibaloi ang kamatuoran, wala siya magpanuko sa pagdawat kang Maria ug sa pagsagop kang Jesus. Dinhi atong matugkad ang pagkalawom sa pagtuo ni Jose. Ang bana usab kinahanglan gayod nga makig-uban sa pagtuo sa iyang asawa. Ug ikaw bana, imo bang giubanan ang imong asawa sa iyang mga buluhaton sa pagtuong Kristohanon, sama sa pag-apil sa cluster meeting, sa pagsimba, sa pag-ampo uban kaniya ug sa mga anak diha sulod sa panimalay? Ato kuno kining tinuoray nga tubagon!
Diha diay sa atong kinabuhi aduna usa'y mga panghitabo nga ang Dios magausab sa atong mga laraw o mga damgo. Ato bang gidawat nga mahinangpon ang maong lakang sa Dios? Gisunod ba nato ang iyang kabubut-on? Daghang higayon nga kini mahitabo ug lisod ra ba gayod ang pagtugkad niini. Mao nga nagkinahanglan gayod kita og pag-ampo aron atong hinayhinay nga masabtan ang mga buot ipabuhat sa Dios kanato. 21b … kay siya magluwas sa iyang katawhan sa ilang mga sala.” 22 Ug kining tanan nahitabo aron matuman ang giingon sa Ginoo pinaagi sa propeta: 23 “Ang birhen magmabdos ug manganak og lalaki, ug siya pagahinganlag Emmanuel” (nga sa ato pa, “Ang Dios ania uban kanato”). Jesus ug Emmanuel naglarawan sa duha ka kamatuoran sa teolohiya: ang una, nga ang Ginoo mangluluwas; ug ang ika-duha, nga ang Ginoo ania uban kanato.
Si Jose maoy naghatag sa unang ngalan Jesus. Ang mabanhaw unya nga si Jesus mao mismo ang mopaila sa iyang kaugalingon nga Emmanuel sumala sa atong mabasa sa katapusang bahin sa Ebanghelyo: “Ako mag-uban kaninyo sa kanunay hangtod sa katapusan sa kalibutan” (Mateo 28:20). Karong umaabot nga Disyembre 25, sa adlaw sa Pasko sa Pagkatawo,kinsa man ang bata nga imong gipasidunggan? Si Jesus ba gayod ang nagsaulog sa iyang adlaw nga natawhan? Sa unsang paagiha nga si Jesus mao gayod ang sentro sa imong pagsaulog sa Pasko? 24 Busa sa pagmata ni Jose iyang gituman ang gisugo sa anghel sa Ginoo kaniya ug nangasawa siya kang Maria. Karon ang plano ni Jose nga iyang untang bulagan si Maria nahan-ay balik ngadto sa unsay orihinal nga laraw: nga iyang pakaslan si Maria. Ug niining higayona mas nahimong balaanon ang ilang panagtipon isip bana ug asawa. Ang pagbalaan diay mao gayod ang kanunay nga pagsunod sa kabubut-on sa Dios diha sa atong kinabuhi, labi na diha sa pagtukod sa iyang gingharian.
|
