EBANGHELYO (Lukas 23:35-43)
35 Nagtindog didto ang mga tawo nga nagtan-aw, samtang nagbugalbugal kaniya ang mga kadagkoan sa mga Judio, nga nag-ingon, "Giluwas niya ang uban, paluwasa siya sa iyang kaugalingon kon siya mao ang Mesiyas nga pinili sa Dios!" 36 Gibugalbugalan usab siya sa mga sundalo; miduol sila ug gitunolan siyag bino, 37 ug miingon, "Kon ikaw ang hari sa mga Judio luwasa ang imong kaugalingon!" 38 Sa ibabaw sa krus gisulat nila kining mosunod: "Kini siya mao ang Hari sa mga Judio." 39 Unya, usa sa mga kriminal nga nagbitay didto mibugalbugal kaniya, "Dili ba ikaw mao man ang Mesiyas? Luwasa ang imong kaugalingon ug kami!" 40 Apan gibadlong siya sa iyang kauban nga nag-ingon, "Wala ka ba mahadlok sa Dios? Kita ania dinhi gisilotan sa mao rang silot. 41 Apan ang silot natong duha angay kanato, kay gisilotan man kita sibo sa atong nabuhat, apan siya walay sala." 42 Ug miingon siya kang Jesus, “Jesus, hinumdomi intawon ako kon maghari ka na!" 43 Miingon si Jesus kaniya, "Sultihan ko ikaw, karong adlawa adto ka sa Paraiso uban kanako." Ang Ebanghelyo sa Ginoo.
oOo
KAHULOGAN SA EBANGHELYO (Lukas 23:35-43)
35 Nagtindog didto ang mga tawo nga nagtan-aw, samtang nagbugalbugal kaniya ang mga kadagkoan sa mga Judio, nga nag-ingon, "Giluwas niya ang uban, paluwasa siya sa iyang kaugalingon kon siya mao ang Mesiyas nga pinili sa Dios!" Tulo ka mga bukid ang giisip nga labing taas nga nahimutangan sa Ebanghelyo: Una, ang bukid nga giwalihan sa unang mensahe ni Jesus (gitawag og bukid sa mga Bulahan o Beatitudes ); Ika-duha, ang bukid nga nahitabo ang pagkausab sa panagway ni Jesus (ang bukid sa Tabor); ug, Ikatulo, ang bukid diin si Jesus gilansang sa krus (ang bukid sa Golgota). Sa Golgota, didto ang mga tawo. Naglantaw sila sa nahimutangan ni Jesus! Ang pulong nga gigamit ni San Lukas alang sa mga tawo mao ang Griego nga “laos” nga maoy gigikanan sa pulong nga Ingles nga “laity” . Sa atong panahon karon kini nagkahulogan og “people of God”. Ang pulong “laos” maoy gigamit diha sa Lukas 19:47-48 diin gihulagway ang mga tawo nga midapig kang Jesus. Nagtindog ang mga katawhan uban sa dakong katingala sa panghitabo: Ilang gituohoan nga si Jesus mao ang Hari nga mobangon sa gingharian sa Israel (Juan 6:15) . Apan si Jesus gibitay ug himatyon sa balabag sa krus!
Sa laing bahin ang mga kadagkoan nagbugalbugal kang Jesus. 36 Gibugalbugalan usab siya sa mga sundalo; miduol sila ug gitunolan siyag bino, 37 ug miingon, "Kon ikaw ang hari sa mga Judio luwasa ang imong kaugalingon!"
Samtang ang mga tawo naglantaw kang Jesus sa hilom, ang mga sundalo nagbiaybiay kaniya. Sama sa gihimo sa yawa sa panahon nga gitintal niya si Jesus—didto sa kamingawan ug didto sa tanaman sa Getsemani, mihagit ang mga sundalo kang Jesus nga iyang ipakita niining higayona ang gahom sa iyang pagka-hari. 38 Sa ibabaw sa krus gisulat nila kining mosunod: "Kini siya mao ang Hari sa mga Judio." Ang pagpahimutang sa mga hari ngadto sa ilang trono giapilan sa seremonyas sa investiture. May usa ka pari nga maoy mohatag og “titulo” kaniya sa pagka-hari (Salmo 110). Didto sa trono sa krus, ang pagpahimutang sa sinulat INRI (Iesus Nazarenus Rex Iudeorum) maoy usa ka seremonyas sa investiture o paghatag sa titulo sa pagka-hari. Hinoon tataw kaayo nga ang gingharian ni Jesus dili susama sa ginghariang kalibutanon (Juan 18:36) . Ang gingharian ni Jesus gisugdan sa pagtukod dinhing kalibutana, apan ang kahingpitan niini atua pa sa sunod kinabuhi.
39 Unya, usa sa mga kriminal nga nagbitay didto mibugalbugal kaniya, "Dili ba ikaw mao man ang Mesiyas? Luwasa ang imong kaugalingon ug kami!"
Ang saysay ni San Lukas gimugna sama sa usa ka drama, uban sa nagkadaiyang mga panghitabo: ang mga tawo “nagtan-aw”, ang mga kadagkoan ug mga sundalo, ug karon ang usa ka kriminal “nagbugalbugal”. Ang Balaod ni Moises nagkinahanglan og duha ka mga saksi alang sa tanang buluhaton nga naghilambigit sa balaod. Ang duha ka mga personahe sa Daang Testamento, si Moises ug Elias maoy mga saksi sa Transpigurasyon (Lukas 9:28-36). Ang pagkabanhaw gisaksihan sa duha ka mga tinun-an sa dalan sa Emmaus (Lukas 24:18) ug gipasiunhan nila ni Pedro ug Juan nga nagsud-ong sa walay sulod nga lubnganan (Lukas 24:4). Ug karon ang duha ka saksi didto sa Golgota mao kining duha ka mga kriminal.
40 Apan gibadlong siya sa iyang kauban nga nag-ingon, "Wala ka ba mahadlok sa Dios? Kita ania dinhi gisilotan sa mao rang silot. 41 Apan ang silot natong duha angay kanato, kay gisilotan man kita sibo sa atong nabuhat, apan siya walay sala."
Taliwala sa iyang kaugalingong pagbati sa kaulaw ug kasakit, aniay tingog nga hagawhaw nga nagagikan sa laing kriminal. Nadunggan gayod kini ni Maria nga maoy gituohang nagsaysay niini ngadto kang Lukas. Pagkatulukibon kaha kadtong maong talan-awon diin ang Gingharian sa Dios napamatud-an nga bukas gayod alang sa tanan, bisan pa sa usa ka makasasala. Ang gikinahanglan mao lamang ang pag-angkon sa sala ug pag-ila kang Jesus nga Manunubos! Ang kawatan maoy una nga buot mopahimulos niining balaang tanyag ni Jesus sa kaluwasan nga alang sa tanang katawhan. 42 Ug miingon siya kang Jesus, “Jesus, hinumdomi intawon ako kon maghari ka na!" 43 Miingon si Jesus kaniya, "Sultihan ko ikaw, karong adlawa adto ka sa Paraiso uban kanako." Si Jesus mao gayod ang “bag-ong Adan”, nga mihatag sa tawo sa pagkakaplag pag-usab sa Paraiso nga Nawagtang. Alang sa matag usa kanato, anaa kanang tawag ni Jesus nga kita mouban kaniya sa Paraiso!
|
