EBANGHELYO (Lukas 20:27-38)
May mga Saduseo nga miduol kang Jesus. (Kini sila mao ang nag-ingon nga ang mga patay dili mabanhaw.) Nangutana sila kaniya, 28 “Magtutudlo, nagsulat si Moises niining balaod alang kanato: 'Kon ang usa ka tawo mamatay ug may asawa nga nahibilin apan walay anak, ang igsuon niadtong tawhana kinahanglan mangasawa sa biyuda aron manganak sila alang sa namatay.' 29 May pito ka magsuong lalaki, ang kamagulangan naminyo ug namatay nga walay anak. 30 Unya ang ikaduhang igsuon nangasawa sa biyuda, 31 ingon man ang ikatulo, hangtod nga ang pito ka magsuon nakapangasawa sa babaye—ug nangamatay silang tanan nga walay anak. 32 Sa katapusan ang babaye maoy namatay. 33 Karon, sa adlaw nga banhawon na ang mga patay, kinsa man siyang asawa nga silang tanan nakapangasawa man kaniya?"
34 Si Jesus mitubag kanila, "Ang mga lalaki ug babaye niining panahona nagminyoay, 35 apan ang mga lalaki ug babaye nga angay banhawon ug magkinabuhi sa umaabot nga panahon dili na magminyoay. 36 Sama sila sa mga anghel ug dili na mamatay. Mga anak sila sa Dios kay gibanhaw man sila. 37 Ug gitin-aw gayod ni Moises ang pagmatuod nga banhawon ang mga patay. Sa bahin nga nagsaysay mahitungod sa sampinit nga nagdilaab, naghisgot siya mahitungod sa Ginoo nga mao ‘Ang Dios ni Abraham, Dios ni Isaac, ug Dios ni Jacob.' 38 Kini nagpasabut nga siya mao ang Dios sa mga buhi ug dili sa mga patay—kay alang kaniya ang tanan buhi.” Ang Ebanghelyo sa Ginoo.
oOo
KAHULOGAN SA EBANGHELYO (Lukas 20:27-38)
27 May mga Saduseo nga miduol kang Jesus. (Kini sila mao ang nag-ingon nga ang mga patay dili mabanhaw.) Nangutana sila kaniya, Ang kamatayon maoy usa ka isyu nga dili mabayabaya, dili malikayan ug labing pinapangutana sa matag tawo. Ug ang sumpay nga pangutana mao nga “adunay bay kinabuhi human sa kamatayon?” Ang tanang mga sibilisasyon naghupot og pagtuo sa “kinabuhi human sa kamatayon”, anaay pagsaulog sa “rituwal alang sa mga patay”, ug nagpabilin ang pagtuo nga ang mga katigulangan nga patay na adunay kabahin sa kinabuhi sa ilang mga kaliwatan.
Sa laing bahin, anaa usab ang pagduda kon adunay ba gayoy “kinabuhi human sa kamatayon” sama sa mga gihuptang baruganan sa mga Saduseo. 28 “Magtutudlo, nagsulat si Moises niining balaod alang kanato: 'Kon ang usa ka tawo mamatay ug may asawa nga nahibilin apan walay anak, ang igsuon niadtong tawhana kinahanglan mangasawa sa biyuda aron manganak sila alang sa namatay.' Usa ka lig-ong kamatuoran nga ang tawo buot gayod nga magbaton og mga kaliwat sa kaugalingon. Mao nga adunay mga sibilisasyon, sama sa mga Judio, nga nagsunod sa gitawag og kaminyoon nga “levirate” diin ang kinabuhi sa usa ka lalaki anaa gipadayon diha sa kinabuhi sa anak. Mao ang patay nga igsoong lalaking walay anak gikinahanglan nga hatagan gayod siya og anak sa lain niyang igsoon. Ang bata nga matawo gikan sa maong panagtipon sa biyuda ug sa maong igsoon pagailhon nga iya gayod sa patayng bana sa biyuda nga karon gipangasawa sa laing igsoon.
29 May pito ka magsuong lalaki, ang kamagulangan naminyo ug namatay nga walay anak. 30 Unya ang ikaduhang igsuon nangasawa sa biyuda, 31 ingon man ang ikatulo, hangtod nga ang pito ka magsuon nakapangasawa sa babaye—ug nangamatay silang tanan nga walay anak. 32 Sa katapusan ang babaye maoy namatay. 33 Karon, sa adlaw nga banhawon na ang mga patay, kinsa man siyang asawa nga silang tanan nakapangasawa man kaniya?" Aron ilang masaway ang pagtuo bahin sa kabanhawan sa mga patay, ang mga Saduseo nangahas pagpangutana kang Jesus. Ang ilang pangutana maoy usa ka larawan sa kasagarang pagtuo nga ang sunod nga kinabuhi usa lamang ka sumpay sa kinabuhi niining kalibutana. Apan atong mahibaloan gikan mismo ni Jesus kon unsa ang kamatuoran kabahin niini. 34 Si Jesus mitubag kanila, "Ang mga lalaki ug babaye niining panahona nagminyoay, 35 apan ang mga lalaki ug babaye nga angay banhawon ug magkinabuhi sa umaabot nga panahon dili na magminyoay.
Ang tubag ni Jesus nagtug-an kanato sa dakong kalainan tali sa “kinabuhi karon” ug sa “kinabuhi nga umaabot”. Iyang gitudlo nga kadto lamang “angayan banhawon” mao lamang gayod ang makasulod ug “magkinabuhi sa umaabot nga panahon”. Busa dili diay ang langit sayon nga pagasudlan. Dili kini susama sa usa ka dakong hawanan nga si bisan kinsa lamang ang makasulod. Susama sa usa ka pasulit alang sa usa ka kurso o propesyon, kadtong “angayan” lamang mao ang makapasar niini. Ang pasulit alang sa “kinabuhing umaabot” mao ang kalidad sa paguyo “sa kinabuhi karon”.
36a Sama sila sa mga anghel ug dili na mamatay.
Taliwala sa kinaugalingong tawhanong panghunahuna kon unsa ang “kinabuhi nga umaabot”, si Jesus mikomparar niadtong mga “angayan” nga nahisama sa mga anghel. Sa ato pa dili kini makomparar sa bisan unsang panghitabo o kasinatian sa kalibutananong kinabuhi. Dili masabot “ang kinabuhi nga umaabot” pinaagi sa siyensya o intelektuwal nga pagtuon. Ang paghunahuna kon didto sa sunod kinabuhi anaa bay seksuwal nga panggibuhaton o wala na ba, daw susama ra sa salimpapaw nga pagpangutana kon anaa bay lalaki o babayeng anghel. Ang atua didto sa langit lahi na kaayo og sa situwasyon kon itandi sa unsay ania kanato karon. Ngano nga si Jesus wala man dugang mopalawom sa iyang pagpasabot sa kahimtang didto sa “kinabuhing umaabot”? Kana tungod kay kon iya kining ihulagway dili pa gayod nato sa hingpit masabot tungod kay wala pa man kitay kasinatian nga susama niini. Dili gayod masabtan sa usa ka bata nga anaa pa sulod sa sabakan sa iyang inahan bisan pa unsa ka lantip ang pagpasabot ngadto kaniya kon unsa ang kalibutan nga iya unyang puy-an.
Ato lamang nga masabot ang maong matang sa kinabuhi kon atua na unya kita didto! 36b Mga anak sila sa Dios kay gibanhaw man sila. Laing kamatuoran nga gitudlo ni Jesus mao nga sa sunod nga kinabuhi mao unya ang atong pagkasuod gayod sa langitnong Amahan. 37 Ug gitin-aw gayod ni Moises ang pagmatuod nga banhawon ang mga patay. Sa bahin nga nagsaysay mahitungod sa sampinit nga nagdilaab, naghisgot siya mahitungod sa Ginoo nga mao ‘Ang Dios ni Abraham, Dios ni Isaac, ug Dios ni Jacob.' 38 Kini nagpasabut nga siya mao ang Dios sa mga buhi ug dili sa mga patay—kay alang kaniya ang tanan buhi.” Ang pagtuo sa kabanhawan dili binuang kon dili usa ka pagtuo gayod sa Dios!
|
